ప్రధాని నరేంద్ర మోదీ గడ్డం పెరుగుతోంది కానీ దేశ ఆర్థిక వ్యవస్థ మాత్రం అభివృద్ధి చెందట్లేదని ఎద్దేవా చేశారు బంగాల్ సీఎం మమతా బెనర్జీ. భాజపా దేశంలోని అతిపెద్ద మోసపూరిత పార్టీ అని ఆరోపించారు. ఆ పార్టీ దేశాన్ని అమ్మేసి మోదీ పేరును పెట్టే రోజు త్వరలోనే రానుందని ద్వజమెత్తారు. పశ్చిమ మెద్నిపుర్ జిల్లాలో పర్యటన సందర్భంగా శుక్రవారం ఈ వ్యాఖ్యలు చేశారు.
"భారత ఆర్థిక వ్యవస్థ కుదేలవుతోంది. పారిశ్రామిక రంగంలో ఎలాంటి అభివృద్ధి లేదు. మొత్తంగా దేశంలో మోదీ గడ్డం పెరుగుదల తప్ప ఎలాంటి అభివృద్ధి కనిపించట్లేదు. మోదీ వస్త్రధారణ ఓసారి రవీంద్రనాథ్ ఠాగూర్లా, మరోసారి మహాత్మ గాంధీలా ఉంటుంది. ఓట్ల కోసం భాజపా ఏమైనా చేస్తుంది. ఏప్రిల్ 1 వరకు నేను నందిగ్రామ్లోనే ఉంటాను. ఎందుకంటే ఇతర రాష్ట్రాల నుంచి భాజపా గూండాలను రప్పించి ఓట్లను లూటీ చేసే అవకాశం ఉంది. గత ఎన్నికల్లో విదేశీయుడన్న కారణంతో బంగ్లాదేశీ నటుడు ఫెరోజ్ను మా పార్టీ తరఫున ప్రచారం చేయకుండా వీసా నిరాకరించారు. మరి మోదీ అమెరికా మాజీ అధ్యక్షుడు ట్రంప్ తరఫున ప్రచారం ఎలా నిర్వహించారు? 'ఆప్ కీ బార్ ట్రంప్ సర్కార్' నినాదం మీకు గుర్తుందా?"
-మమతా బెనర్జీ, బంగాల్ ముఖ్యమంత్రి
అన్ని పార్టీలు ఐదు రాష్ట్రాల ఎన్నికల హడావిడిలో ఉంటే భాజపా ప్రభుత్వం మాత్రం దిల్లీ ప్రభుత్వానికి ఉన్న రాజ్యాంగ అధికారాలకు కాల రాసేలా బిల్లులు ప్రవేశపెట్టిందన్నారు. ఇది సిగ్గుపడాల్సిన చర్య అన్నారు. ఈవీఎంలను భాజపా ట్యాంపర్ చేసే అవకాశం ఉంది కాబట్టి అప్రమత్తంగా ఉండాలని తృణమూల్ కాంగ్రెస్ శ్రేణులకు సూచించారు.
ఇదీ చదవండి : 'మహా'లో 36 వేల 902 కేసులు- 28 నుంచి రాత్రి కర్ఫ్యూ
