ఆగస్టు 5వ తేదీ భారతదేశ చరిత్రలో నిలిచిపోతుందన్నారు ప్రధానమంత్రి నరేంద్ర మోదీ. ఆర్టికల్ 370 రద్దు, రామ మందిర నిర్మాణానికి తొలి అడుగు ఇదే రోజు పడినట్లు తెలిపారు. ఉత్తర్ప్రదేశ్కు చెందిన.. ప్రధానమంత్రి గరీబ్ కల్యాణ్ అన్న యోజన లబ్ధిదారులతో వీడియో కాన్ఫరెన్స్ ద్వారా మాట్లాడారు మోదీ. కొవిడ్-19 వ్యాక్సిన్ తీసుకునేలా ప్రజలను ప్రోత్సహించాలని, పుకార్లను నమ్మొద్దని కోరారు. ఈ మేరకు రాష్ట్రవ్యాప్తంగా అవగాహన కార్యక్రమాన్ని ప్రారంభించారు. గత ప్రభుత్వాల్లో పేదలకు అందే ఆహార ధాన్యాలు దోపిడికి గురయ్యాయన్నారు.
పెగసస్ వ్యవహారంపై పార్లమెంట్ కార్యకలాపాలను అడ్డుకుంటున్న విపక్షాలపై విమర్శలు గుప్పించారు మోదీ. అభివృద్ధి పథంలో నడవకుండా దేశాన్ని ఎవరూ అడ్డుకోలేరని స్పష్టం చేశారు. అభివృద్ధిని అడ్డుకోవటమే విపక్షాల లక్ష్యమని ధ్వజమెత్తారు. వారి చర్య దేశవ్యతిరేకమన్నారు. దేశం ఓవైపు గోల్పై గోల్ చేస్తుంటే, కొందరు సొంత రాజకీయ ఎజెండా కోసం సెల్ఫ్ గోల్ చేసుకుంటున్నారని విమర్శించారు.
"చరిత్రలో ఆగస్టు 5 గుర్తుండిపోతుంది. రెండేళ్ల క్రితం ఇదే రోజున ఆర్టికల్ 370 రద్దయింది. గత ఏడాది ఈ రోజున అయోధ్యలో రామమందిర నిర్మాణానికి తొలి అడుగు పడింది. ఈరోజు రామ మందిర నిర్మాణ పనులు జరుగుతున్నాయి. కొంత మంది (ప్రతిపక్షాలు) పార్లమెంట్ కార్యకలాపాలకు అంతరాయం కలిగించడానికి, దేశాభివృద్ధిని అడ్డుకునేందుకు ఎంత ప్రయత్నించినా.. అలాంటి రాజకీయాలకు, స్వార్థానికి దేశం బందీ కాదు. సరికొత్త భారత్ ర్యాంకుల ద్వారా కాకుండా మెడల్స్ సాధించటం వల్ల ప్రపంచ గుర్తింపు పొందుతోంది. అది కుటుంబంతో కాదు, కష్టపడినప్పుడే రుజువుతుంది. భారతీయ యువత లక్ష్య సాధనలో ముందుకు సాగుతున్నారు."
-నరేంద్ర మోదీ, ప్రధానమంత్రి
కొన్నేళ్ల క్రితం.. ఉత్తర్ప్రదేశ్ను రాజకీయ కోణంలోనే చూశారని, దేశాభివృద్ధిలో కీలక పాత్ర పోషించే అవకాశాల గురించి ఆలోచించలేదని ఆరోపించారు మోదీ. కానీ, కొద్ది సంవత్సరాలుగా రాష్ట్ర అభివృద్ధి ఇంజిన్ పుంజుకుందన్నారు.
ఇదీ చూడండి: 'ఆ వార్తలు నిజమైతే.. 'పెగసస్'ను తీవ్రంగా పరిగణిస్తాం'
