నీతి ఆయోగ్ పాలక మండలి ఆరో సమావేశం ప్రధానమంత్రి నరేంద్ర మోదీ అధ్యక్షతన శనివారం జరగనుంది. వ్యవసాయం, మౌలిక వసతులు, ఉత్పత్తి, మానవ వనరుల అభివృద్ధి, ఆరోగ్యం, కరోనా అనంతర పరిస్థితులు తదితర అంశాలపై ఈ భేటీలో చర్చించనున్నారు.
అన్ని రాష్ట్రాల ముఖ్యమంత్రులు, కేంద్ర పాలిత ప్రాంతాల లెఫ్టినెంట్ గవర్నర్లు, పలువురు కేంద్రం మంత్రులు, ఉన్నతాధికారులు ఈ పాలక మండలిలో సభ్యులుగా ఉన్నారు.
నీతి ఆయోగ్ పాలక మండలి ఆరో సమావేశంలో కేంద్ర పాలిత ప్రాంతంగా జమ్ముకశ్మీర్తో పాటు తొలిసారి లద్దాఖ్ భాగం కానుంది. ఈసారి ఇతర కేంద్ర పాలిత ప్రాంతాల అధినేతలను సైతం ఆహ్వానించారు. అలాగే.. పాలక మండలి ఎక్స్ అఫిసియో సభ్యులు, వైస్ ఛైర్మన్, సభ్యులు, సీఈఓ, ఇతర ఉన్నతాధికారులు హాజరుకానున్నారు.
పాలక మండలి సమావేశం తొలిసారి 2015, ఫిబ్రవరి 8న జరగగా.. అప్పటి నుంచి క్రమం తప్పకుండా జరుగుతోంది. అయితే.. కరోనా కారణంగా గత ఏడాది సమావేశం రద్దయింది.
మమత, అమరిందర్ దూరం..!
పంజాబ్ ముఖ్యమంత్రి అమరిందర్ సింగ్ అనారోగ్యం కారణంగా నీతి ఆయోగ్ పాలక మండలి సమావేశానికి దూరం కానున్నారు. ఆయన స్థానంలో రాష్ట్ర ఆర్థిక మంత్రి మన్ప్రీత్ సింగ్ బాదల్ హాజరుకానున్నారని అధికార వర్గాలు తెలిపాయి. మరోవైపు.. బంగాల్ ముఖ్యమంత్రి మమతా బెనర్జీ సైతం ఈ సమావేశానికి దూరంగా ఉండాలని భావిస్తున్నట్లు సమాచారం.
ఇదీ చూడండి: అంతర్జాతీయ ఆర్బిట్రేషన్‌ తీర్పుపై భారత్ 'సవాల్'?
