Common dress code Supreme Court: దేశవ్యాప్తంగా విద్యా సంస్థల్లో ఒకే డ్రెస్కోడ్ నిబంధనను అమలు చేయాలంటూ సుప్రీంకోర్టులో ప్రజా ప్రయోజన వ్యాజ్యం దాఖలైంది. విద్యార్థులతో పాటు సిబ్బందికీ ఈ దుస్తుల నిబంధన ఉండాలేలా కేంద్ర, రాష్ట్ర ప్రభుత్వాలు చూడాలని వ్యాజ్యంలో కోరారు. నిఖిల్ ఉపాధ్యాయ్ అనే వ్యక్తి న్యాయవాదులు అశ్వినీ ఉపాధ్యాయ్, అశ్వనీ దుబేల ద్వారా ఈ వ్యాజ్యం దాఖలు చేశారు. డ్రెస్కోడ్ అమలు చేయడం ద్వారా జాతీయ సమైఖ్యత, సమానత్వం, సోదరభావాన్ని పెంపొందించినట్లవుతుందని అన్నారు. ఇందుకోసం కేంద్రం ఓ జ్యుడిషియల్ కమిషన్ లేదా నిపుణుల కమిటీని ఏర్పాటు చేసి సామాజిక, ఆర్థిక న్యాయం, లౌకికవాదం, ప్రజాస్వామ్య విలువలను ప్రోత్సహించి.. విద్యార్థుల్లో ఐక్యత, జాతీయ సమైఖ్యతను పెంపొందించేలా చూడాలని విజ్ఞప్తి చేశారు.
Hijab Supreme Court:
"విద్యా సంస్థలు బహిరంగ లౌకిక ప్రదేశాలు. జ్ఞానం పెంపొందించేందుకు, ఉద్యోగ, ఉపాధి అవకాశాలు కల్పించేందుకు, దేశాభివృద్ధికి పాటుపడేందుకు ఈ సంస్థలు పనిచేస్తాయి. అవసరమైన, అవసరం లేని మతపరమైన పద్ధతులను పాటించేందుకు కాదు. విద్యా సంస్థల లౌకిక భావాన్ని కాపాడేందుకు అన్ని కళాశాలలు-పాఠశాలల్లో సాధారణ డ్రెస్కోడ్ నిబంధన తీసుకురావడం చాలా ముఖ్యం. ఏకరూపత కోసమే కాకుండా.. వేర్వేరు ప్రదేశాలు, మతాలు, కులాలు, సంస్కృతులకు చెందిన విద్యార్థుల్లో స్నేహభావాన్ని పెంపొందించేందుకు డ్రెస్కోడ్ ఉపయోగపడుతుంది. లేదంటే రేపు ఓ నాగ సాధు కళాశాలలో అడ్మిషన్ తీసుకొని... మతాచారం పేరుతో వస్త్రాలు ధరించకుండానే తరగతులకు హాజరయ్యే ప్రమాదం ఉంది."
-సుప్రీంలో దాఖలైన వ్యాజ్యం
అమెరికా, యూకే, ఫ్రాన్స్, సింగపూర్, చైనా దేశాల్లో డ్రెస్కోడ్ నిబంధన ఉందని పిటిషనర్ గుర్తు చేశారు. ఈ సందర్భంగా ఓ సర్వే గురించి ప్రస్తావించారు. 'ఓ సర్వే ప్రకారం 2018లో 2.5 లక్షల తుపాకులను కళాశాలలు, పాఠశాలల్లోకి తీసుకొచ్చారు. డ్రెస్కోడ్ నిబందన తీసుకురావడం వల్ల బెల్ట్లైన్ బయటకు కనిపిస్తుంది. ఆయుధాల భయం ఉండదు' అని చెప్పుకొచ్చింది.
సెలవులు..
Karnataka PU Colleges holiday: మరోవైపు, కర్ణాటక ప్రభుత్వం ప్రీ-యూనివర్సిటీ కాలేజీలకు సెలవులు పొడగించింది. ఫిబ్రవరి 15 వరకు సెలవులు కొనసాగిస్తున్నట్లు తెలిపింది. శాంతి భద్రతలు కాపాడేందుకు ముందుజాగ్రత్త చర్యగా ఈ నిర్ణయం తీసుకున్నట్లు రాష్ట్ర ప్రభుత్వం వెల్లడించింది. డిగ్రీ, డిప్లొమా కళాశాలలు ఫిబ్రవరి 16 వరకు మూసే ఉండనున్నాయి. 9, 10వ తరగతి విద్యార్థులకు మాత్రం ఫిబ్రవరి 14 నుంచి యథాతథంగా కొనసాగనున్నాయి.
గతేడాది డిసెంబర్ చివర్లో హిజాబ్ వివాదం మొదలైంది. హిజాబ్ ధరించిన కొందరు మహిళలను ఉడుపిలోని ఓ ప్రభుత్వ ప్రీ-యూనివర్సిటీ కళాశాల యాజమాన్యం లోపలికి అనుమతించలేదు. దీనిపై నిరసన వ్యక్తమైంది. దీంతో హిందూ విద్యార్థులు కాషాయ కండువాలు ధరించి కళాశాలలోకి వచ్చేందుకు ప్రయత్నించారు.
ఇదీ చదవండి: దిల్లీ నడి వీధిలో ఇనుప రాడ్లతో దాడి.. దృశ్యాలు వైరల్
