కమెడియన్ కునాల్ కమ్రా చేసిన అభ్యంతరకర ట్వీట్లపై ఎలాంటి చర్యలు తీసుకోని ట్విట్టర్పై పార్లమెంటరీ సంయుక్త కమిటీ(జేపీసీ) ఆగ్రహం వ్యక్తం చేసింది. ఈ విషయంలో వివరణ సమర్పించాలని ట్విట్టర్ను జేపీసీ ఛైర్పర్సన్ మీనాక్షి లేఖి ఆదేశించారు. సుప్రీం కోర్టును, సీజేఐను ఉద్దేశిస్తూ ట్వీట్లు చేశాడు కునాల్.
అంతకుముందు.. లద్దాఖ్‌ను చైనాలో భాగంగా చూపడంపై క్షమాపణలు తెలియజేసింది ట్విట్టర్. తమ తప్పును ఈ నెల చివరి నాటికి సరిదిద్దుకుంటామని సంయుక్త పార్లమెంటరీ కమిటీకి వివరించింది. సమాచార పరిరక్షణ బిల్లుపై భాజపా ఎంపీ మీనాక్షి లేఖి నేతృత్వంలో ఏర్పాటైన జేపీసీ ముందు.. హాజరైన ట్విట్టర్ ప్రతినిధులు.. ఈ మేరకు తమ వివరణ ఇచ్చుకున్నారు. ఆ సందర్భంలో కునాల్ కమ్రా ట్వీట్లపై ట్విట్టర్ను ప్రశ్నించింది జేపీసీ.
"సుప్రీం కోర్టు, సీజీఐకు వ్యతిరేకంగా కునాల్ కమ్రా చేసిన ట్వీట్లకు ట్విట్టర్ అనుమతినివ్వడం అవమానకరం. రాజ్యాంగ వ్యవస్థలోని ఉన్నతాధికారాలు గల సుప్రీం కోర్టుపై, సీజేఐపై తప్పుడు వ్యాఖ్యలకు ట్విట్టర్ అనుమతి ఇస్తోంది. దీనిపై కమిటీలోని సభ్యులందరు ట్విట్టర్పై అసంతృప్తితో ఉన్నారు. గతంలో నిషేధించిన ఖాతాలు, పోస్టులపై వివరణ ఇవ్వాలని ట్విట్టర్ను మేం ఆదేశించాం."
-- మీనాక్షి లేఖి, సంయుక్త పార్లమెంటరీ కమిటీ ఛైర్పర్సన్.
అయితే.. ఈ విషయంలో తన ట్వీట్లను ఉపసంహరించుకోవడానికి నిరాకరించారు కునాల్. రిపబ్లిక్ టీవీ ఎడిటర్ అర్నబ్ గోస్వామికి మధ్యంతర బెయిల్ ఇచ్చింది సుప్రీం కోర్టు. దీనిని విమర్శిస్తూ ట్వీట్లు చేశాడు కునాల్. ఈ అంశంలో అతడిపై కోర్టు ధిక్కార చర్యలు తీసుకునేందుకు అటార్నీ జనరల్ కేకే వేణుగోపాల్ సిద్ధమయ్యారు.
