Parliament staff Covid: కొద్ది రోజుల్లో బడ్జెట్ సమావేశాలు ప్రారంభం కానున్న తరుణంలో పార్లమెంట్లో కరోనా కలకలం సృష్టిస్తోంది. ఇప్పటికే 400 మందికిపైగా సిబ్బంది, అధికారులు కొవిడ్-19 బారినపడ్డారు.
"జనవరి 4 నుంచి 8వ తేదీ వరకు మొత్తం 1,409 మందికి చేపట్టిన కరోనా పరీక్షల్లో 402 మందికి కొవిడ్ పాజిటివ్గా తేలింది. ఒమిక్రాన్ వేరియంట్ నిర్ధరణకు వారి నమూనాలను జినోమ్ సీక్వెన్సింగ్కు పంపించాం."
- అధికారులు
కరోనా సోకిన వారిలో 200 మంది లోక్సభ, 69 మంది రాజ్యసభ సిబ్బంది సహా మరో 133 మంది సహాయ సిబ్బంది ఉన్నట్లు అధికారులు పేర్కొన్నారు. వారంతా కరోనా జాగ్రత్తలు, ప్రభుత్వ మార్గదర్శకాలు పాటించాలని సూచించినట్లు తెలిపారు. పార్లమెంట్ వెలుపల కొవిడ్ సోకిన సిబ్బందిని ఈ జాబితాలో చేర్చలేదని పేర్కొన్నారు. కరోనా సోకిన తోటి సిబ్బందిని కలిసిన వారిని ఐసోలేషన్కు తరలించామని, పలువురు లోక్సభ, రాజ్యసభ అధికారులు సైతం వైరస్ బారినపడినట్లు చెప్పారు.
వెంకయ్య కీలక ఆదేశాలు..
పార్లమెంట్లో కరోనా కలకలం సృష్టించిన నేపథ్యంలో పరిస్థితులను సమీక్షించారు రాజ్యసభ ఛైర్మన్ వెంకయ్య నాయుడు. ఈనెల చివరి వారంలో బడ్జెట్ సమావేశాలు ప్రారంభం కానున్న నేపథ్యంలో కరోనా వ్యాప్తి చెందటంపై ఆందోళన వ్యక్తం చేశారు. వైరస్ కట్టడికి తగిన చర్యలు తీసుకోవాలని అధికారులను ఆదేశించారు. దివ్యాంగులు, గర్భిణీలు ఇంటి నుంచే పని చేసేందుకు అనుమతులిచ్చారు. రాజ్యసభ సచివాలయం సమయాల్లో మార్పులు చేశారు. అధికారిక సమావేశాలను వర్చువల్గా నిర్వహించాలని నిర్ణయించారు. సిబ్బంది హాజరును సగానికి తగ్గించినట్లు రాజ్యసభ సెక్రెటేరియట్ తెలిపింది. కొత్త ఆదేశాల ప్రకారం సెక్రెటరీ లేదా ఎగ్జిక్యూటివ్ ఆఫీసర్ ర్యాంకు కింది స్థాయి అధికారులు, సిబ్బంది 50 శాతం మంది జనవరి 31 వరకు వర్క్ ఫ్రమ్ హోం ద్వారా విధులు నిర్వర్తించాల్సి ఉంటుంది.
ఇదీ చూడండి: పార్లమెంట్లో కరోనా కలకలం- 350 మందికి పాజిటివ్
