పంజాబ్ ఫిరోజ్పుర్ సెక్టార్లోని అంతర్జాతీయ సరిహద్దులో సోమవారం ఓ పాకిస్థాన్ డ్రోన్ను కూల్చివేసింది సరిహద్దు భద్రతా దళం (బీఎస్ఎఫ్). అందులో 4కేజీల నిషేధిత వస్తువులు ఉన్నట్లు ఓ అధికారి వెల్లడించారు.
తెల్లవారుజామున 3గంటల సమయంలో డ్రోన్ శబ్దానికి అప్రమత్తమై.. దానిని గురిపెట్టేందుకు పారా బాంబులను ఉపయోగించి ఆ ప్రాంతాన్ని ప్రకాశవంతం చేసినట్లు బీఎస్ఎఫ్ అధికార ప్రతినిధి తెలిపారు. డ్రోన్కు ఓ చిన్న ఆకుపచ్చ సంచి ఉందని, అందులో పసువు రంగులో నాలుగు ప్యాకెట్లు, ఓ నలుపు ప్యాకెట్ ఉన్నాయని వెల్లడించారు.
ఉగ్రకుట్ర భగ్నం..
జమ్ముకశ్మీర్లోని అవంతిపొరలో ఉగ్రకుట్రను భగ్నం చేశారు పోలీసులు. జైషే మహ్మద్ ఉగ్రసంస్థకు చెందిన నలుగురు ఉగ్ర సహచరులను అరెస్టు చేశారు. ఉగ్రవాదులకు ఆశ్రయం ఇవ్వడం సహా ఆయుధాల తరలింపులో వీరు సహకరించినట్లు అధికారులు తెలిపారు.
గ్రెనేడ్ దాడిలో మరొకరు మృతి
శ్రీనగర్లోని అమిరా కడల్ ప్రాంతంలో ఆదివారం జరిగిన గ్రెనేడ్ దాడిలో మృతుల సంఖ్య రెండుకు చేరింది. ఈ ఘటనలో 23 మంది పౌరులు సహా ఓ పోలీసు గాయపడ్డారు. గాయపడిన ఓ పౌరుడు చికిత్స పొందుతూ ఆదివారమే మృతిచెందాడు. ఈ దాడికి సంబంధించి కొన్ని కీలకమైన ఆధారాలు లభించాయని, నేరస్థులను అరెస్టు చేయడం కోసం తీవ్రంగా కృషి చేస్తున్నట్లు పోలీసులు తెలిపారు.
ఇదీ చూడండి: సరిహద్దుల్లో మరోసారి డ్రోన్ల కలకలం.. పాక్ పనేనా?
