పాక్ ఆక్రమిత కశ్మీర్లోని అరాచకాలు జరుగుతున్నాయని.. ఇలా చేస్తే తర్వాత తీవ్ర పరిణామాలను ఎదుర్కోవాల్సి వస్తుందని హెచ్చరించారు రక్షణమంత్రి రాజ్నాథ్ సింగ్. పాకిస్థాన్ ఆక్రమిత కశ్మీర్ను త్వరలోనే తిరిగి స్వాధీనం చేసుకుంటామని స్పష్టం చేశారు. శ్రీనగర్‌లో నిర్వహించిన 'శౌర్య దివస్' కార్యక్రమంలో పాల్గొని ప్రసంగించారు. జంట కేంద్రపాలిత ప్రాంతాలైన జమ్ము కశ్మీర్, లద్దాఖ్ను అన్ని రంగాల్లో అభివృద్ధి చేస్తామని చెప్పారు. తమ అభివృద్ధి ప్రస్థానాన్ని జమ్ముకశ్మీర్, లద్దాఖ్లో ఇప్పుడే ప్రారంభించామని.. తమ లక్ష్యమైన గిల్గిట్, బాల్టిస్థాన్కు త్వరలోనే చేరుకుంటామని పేర్కొన్నారు.
మానవ హక్కుల పేరిట పాకిస్థాన్ మొసలి కన్నీరు కారుస్తోందని విమర్శించారు రాజ్నాథ్ సింగ్. పీఓకే ప్రజల బాధలు వారినే కాకుండా తమను కూడా బాధిస్తాయన్నారు. ఉగ్రవాదానికి మతం లేదని.. భారత్పై గురిపెట్టడమే వారి లక్ష్యమని తెలిపారు. ప్రధానమంత్రి నరేంద్ర మోదీ నాయకత్వంలో ఆర్టికల్ 370ని రద్దు చేశామని.. దీని వల్ల జమ్ము కశ్మీర్ ప్రజలపై జరుగుతున్న వివక్ష అంతమైందన్నారు. శ్యామ్ప్రసాద్ ముఖర్జీ చేపట్టిన 'జమ్ము కశ్మీర్ ఏకతా యజ్ఞం' 2019 ఆగస్ట్ 5న పూర్తైందని పేర్కొన్నారు.
భారత్ భూభాగంపై జరిగిన తొలిదాడిని 1947 అక్టోబర్‌ 27 సైన్యం తిప్పికొట్టింది. ఈ సందర్భంగా సిక్కు రెజిమెంట్‌లోని 1వ బెటాలియన్‌ అద్భుతమైన ధైర్యసాహసాలను ప్రదర్శించింది. దీనిని పురస్కరించుకొని ఆర్మీ 'ఇన్‌ఫాంట్రీ డే'ను జరుపుకొంటుంది. మరోవైపు ఆ యుద్ధంలో వాయుసేన తొలి విమానం శ్రీనగర్‌లో ల్యాండ్‌ అయింది కూడా అక్టోబర్‌27నే. ఈ నేపథ్యంలో సైన్యం, వాయుసేన కలిసి శౌర్యదివస్‌ను నిర్వహించుకొంటున్నాయి. శ్రీనగర్‌లో వాయుసేన బేస్‌ ఏర్పాటు చేసి నేటితో 50 ఏళ్లు పూర్తయ్యాయి.
ఇవీ చదవండి: గుజరాత్లో త్రిముఖ పోరు.. దళిత ఓటర్ల దయ ఎటువైపో!
వెబ్ సిరీస్ చూసి మర్డర్ స్కెచ్.. భార్య ఆత్మహత్యను షూట్ చేసిన భర్త
