Padma Awards Refused: గణతంత్ర దినోత్సవం సందర్భంగా.. కేంద్ర ప్రభుత్వం ప్రకటించిన పద్మ పురస్కారాలను వద్దనుకుంటున్న వారి జాబితా పెరుగుతోంది. ఇప్పటికే పద్మభూషణ్ పురస్కారాన్ని సీపీఎం సీనియర్ నేత, బంగాల్ మాజీ సీఎం బుద్ధదేవ్ భట్టాచార్య తిరస్కరించారు.
Singing legend Sandhya Mukherjee: అదే రాష్ట్రానికి చెందిన ప్రముఖ గాయని సంధ్యా ముఖర్జీ కూడా పద్మశ్రీ స్వీకరించేందుకు నిరాకరించారు. ఇప్పుడు.. బంగాల్కు చెందిన ప్రముఖ వాద్యకారుడు పండిట్ అనింద్య ఛటర్జీ తనకు ప్రకటించిన పద్మశ్రీ వద్దంటున్నారు.
పద్మశ్రీ వచ్చినట్లు మంగళవారమే దిల్లీ నుంచి ఫోన్ వచ్చిందని చెప్పిన అనింద్య.. తన కెరీర్ ఈ దశలో ఉన్నప్పుడు పద్మశ్రీ అందుకోవడానికి సిద్ధంగా లేనని వెల్లడించారు.
''నాకు పద్మశ్రీ వచ్చిందని మంగళవారమే దిల్లీ నుంచి ఫోన్ వచ్చింది. కానీ నేను సున్నితంగా తిరస్కరించా. నేను వారికి ధన్యవాదాలు చెప్పాను కానీ.. నా కెరీర్ ఈ దశలో ఉన్నప్పుడు పద్మశ్రీ అందుకునేందుకు నేను సిద్ధంగా లేను. ఆ ఫేజ్ ఎప్పుడో దాటేశా.''
- అనింద్య ఛటర్జీ, తబలా వాద్యకారుడు
- Tabla Maestro Anindya Chatterjee: 10 సంవత్సరాల క్రితమే ఈ పురస్కారం వచ్చి ఉంటే.. ఆనందంగా స్వీకరించేవాడినని అనింద్య అన్నారు. 'ఏదేమైనా నేను అవార్డు తీసుకోను.. క్షమించండి' అని చెప్పారు.
- పండిట్ రవిశంకర్, ఉస్తాద్ అమ్జద్ అలీ ఖాన్, ఉస్తాద్ అలీ అక్బర్ ఖాన్ వంటి మహామహులతో కలిసి పనిచేశారు ఛటర్జీ. 2002లో సంగీత్ నాటక్ అకాడమీ అవార్డు కూడా అందుకున్నారు.
90 ఏళ్ల వయసులో.. దాదాపు 8 దశాబ్దాల పాటు పాటలు పాడిన వ్యక్తికి 'పద్మశ్రీ' ప్రకటించడం ఆమె స్థాయిని తగ్గించడమే అని అన్నారు సంధ్యా ముఖర్జీ కుమార్తె సౌమి సేన్గుప్తా.
Buddhadeb Bhattacharjee News: బుద్ధదేవ్ భట్టాచార్య కూడా తనను పద్మభూషణ్ పురస్కారం తీసుకోవాలని సంప్రదించినప్పుడు తిరస్కరించారు. బుద్ధదేవ్తో పాటు పార్టీ కూడా ఇదే నిర్ణయం తీసుకున్నట్లు సీపీఎం ఒక ప్రకటనలో తెలిపింది. తాము పనిచేసేది ప్రజల కోసమని, అవార్డుల కోసం కాదని ట్విట్టర్లో పేర్కొంది.
అయితే.. పద్మభూషణ్ పురస్కారాన్ని తిరస్కరిస్తున్నట్లు బుద్ధదేవ్ కుటుంబసభ్యులెవరూ తమకు చెప్పలేదని అధికార వర్గాలు పేర్కొన్నాయి. అవార్డుకు ఎంపికైనవారికి ఆ విషయాన్ని ముందే తెలియజేస్తామని, పురస్కారాన్ని స్వీకరించడం వారికి ఇష్టం లేకపోతే తుది జాబితా నుంచి వారి పేర్లను తొలగిస్తామని వివరించాయి.
సంబంధం కోసం వెతుకుతున్నారా? తెలుగు మాట్రిమోనిలో రిజిస్ట్రేషన్ ఉచితం!
ఇవీ చూడండి: పద్మభూషణ్ అవార్డును తిరస్కరించిన బంగాల్ మాజీ సీఎం
