చేతిలో ఇమిడే 'ఆక్సిజన్​ బాటిళ్లు'.. దొరికేది ఎక్కడంటే?

శ్వాసకోశ సమస్యలతో బాధపడేవారికి చేయూతనిచ్చేలా కేరళలోని ఓ మెడికల్ షాపు యాజమాన్యం వినూత్న ఆలోచన చేసింది. ఎలాంటి పరిస్థితుల్లో ఉన్నా ఆక్సిజన్​ అందించేలా చేసింది. ఇంతకీ వారేం చేశారో తెలుసుకోవాలంటే ఈ కథనం చదివేయండి.

కరోనా విపత్కర పరిస్థితుల్లో చాలా మందిలో శ్వాసకోశ సమస్యలు పెరిగాయి. ఈ తరుణంలో ఆక్సిజన్​ సిలిండర్ల కొరత వైద్యరంగానికి సవాల్​గా మారింది. ఇలాంటి పరిస్థితుల్లో అస్తమా, గుండెపోటు సమస్యలున్న వారికి తీవ్ర ఇబ్బందులు తలెత్తాయి. ఈ సమస్యను అధిగమించడానికి కేరళలోని ఓ మెడికల్ షాపు యాజమాన్యం వినూత్న ఆలోచన చేసింది. ఎక్కడికైనా తీసుకెళ్లేలా, చేతిలో ఇమిడేలా ఆక్సిజన్​ బాటిళ్లను తయారు చేసింది.

ఆక్సిజన్​ 'స్ప్రే'

ఇంట్లో పనిచేయడం, మెట్లెక్కడం లాంటి చిన్న చిన్న పనులు చేస్తున్నప్పుడు కూడా అస్తమా, గుండెపోటు సమస్యలు ఎదుర్కొంటున్నవారికి శ్వాసతీసుకోవడం ఇబ్బందికరంగా మారుతోంది. అయితే.. ఇలాంటి సమస్యకు చెక్​ పెట్టేందుకు తిరువనంతపురం పట్టొమ్​లోని 'ఆర్​టీఎఫ్'​ మెడికల్​ షాపు యాజమాన్యం ఆక్సిజన్​ బాటిళ్లను తయారు చేస్తోంది.

స్ప్రే బాటిళ్ల మాదిరిగా ఉండే ఈ ఆక్సిజన్​ బాటిళ్లను తయారు చేసేందుకు ఇటాలియన్​ సాంకేతికతను ఉపయోగిస్తోంది ఆర్​టీఎఫ్​. చెన్నై కేంద్రంగా ఈ బాటిళ్లను తయారు చేయించడం విశేషం.

2 సంవత్సరాలు ఉపయోగించేలా..

150 సార్లు శ్వాసతీసుకునేలా ఆరు లీటర్ల ఆక్సిజన్​ను ఒక్క బాటిల్​లో అమర్చారు. రెండేళ్లపాటు వినియోగించేలా దీన్ని తయారు చేశారు. ఆన్​లైన్​లో రూ. 600 నుంచి రూ.650 వరకూ విక్రయిస్తున్నా మెడికల్​ షాపులో ఒక్కో బాటిల్​ను రూ. 500కే అందిస్తున్నారు. కేవలం 250 గ్రాముల బరువుండే ఈ బాటిల్​ను కొనేందుకు చాలా మంది మెడికల్​ షాపు వద్ద బారులు కడుతున్నారు.

50 ఏళ్లు పైబడిన వారు ఎక్కువగా ఈ బాటిళ్లను కొనేందుకు వస్తున్నారని మెడికల్ షాపు యాజమాన్యం చెబుతోంది. నెలకు దాదాపు 60 బాటిళ్లు విక్రయిస్తున్నట్లు పేర్కొంది.

ఇదీ చదవండి:బిచ్చమెత్తుకునే అభాగ్యురాలిపై ఐదుగురు హత్యాచారం