కేంద్రం ప్రవేశపెట్టిన బడ్జెట్... పెట్టుబడిదారులకు మాత్రమే మేలు చేసేలా ఉందని విపక్షాలు ఆరోపించాయి. బడ్జెట్పై రాజ్యసభలో చర్చ సందర్భంగా మోదీ ప్రభుత్వంపై తీవ్ర విమర్శలు గుప్పించాయి.
నోట్ల రద్దు, జీఎస్టీ వంటి నిర్ణయాలతో దేశం ఇప్పటికే సతమతం అవుతోంది. కేంద్రం సంపన్నులకు ప్రోత్సాహం అందిస్తూ పేద వారిని ఆత్మ నిర్భర్ అవమంటోంది. రాష్ట్రాల పన్ను వాటాను తగ్గించేందుకు కేంద్రం సెస్ విధిస్తోంది.
-శక్తిసింగ్ గొహిల్, కాంగ్రెస్ నేత
ఆత్మనిర్భర్ పేరుతో ప్రవేశపెట్టిన ఈ బడ్జెట్ను వ్యాపారవేత్తలకు అనుకూలంగా ఉందనే విషయం స్పష్టంగా తెలుస్తోంది. వాణిజ్య రంగానికి దాసోహమనడమేనా ఆత్మనిర్భర్ భారత్ అంటే? ప్రజలను మోసం చేసేందుకు ప్రయత్నించకండి.
-బినోయ్ బిశ్వమ్, సీపీఐ నేత
మహమ్మారిని ఎదుర్కోవడానికి తగినట్టు ఈ బడ్జెట్ను రూపొందించారు. కానీ ప్రైవేటీకరణ అన్ని రంగాలకు మేలు చేయదు. ప్రైవేటు సంస్థలు గుత్తాధిపత్యం చేసే అవకాశం ఉంటుంది.
-హెచ్డీ దేవ గౌడ, జేడీఎస్
ఇందులో సామాన్యుడికి ఒరిగేది ఏం లేదు. దేశ ఆస్తులను, ప్రభుత్వం రంగ సంస్థలను అమ్మడమే బడ్జెట్లో కనిపిస్తోంది. కేంద్రం ధనికులను మరింత ధనవంతులని, పేదవారిని మరింత పేదవారిని చేయాలనుకుంటోంది. పేదలు, దళితుల హక్కులు పారిశ్రామికవేత్తలు ఇవ్వడం భావ్యం కాదు. ప్రైవేటు రంగంలో ఎస్సీ, ఎస్టీ, ఓబీసీలకు ప్రత్యేక కోటా కల్పించాలి.
-అశోక్ సిద్ధార్థ్, బీఎస్పీ
క్యాన్సర్ చికిత్స కోసం దిగుమతి చేసుకునే యంత్రాలపై కస్టమ్స్ సుంకాన్ని తగ్గించాలని బీఎస్పీ నేత సతీశ్ చంద్ర మిశ్రా డిమాండ్ చేశారు.
ఇదీ చదవండి : ఆత్మనిర్భర్ భారత్ లక్ష్యంగానే బడ్జెట్: నిర్మల
