సరిహద్దుల్లో చైనా దురాక్రమణ విషయంలో కేంద్ర ప్రభుత్వంపై సమష్టిగా పోరాడాలని విపక్షాలు నిర్ణయించాయి. కాంగ్రెస్ అధ్యక్షుడు మల్లిఖార్జున ఖర్గే నేతృత్వంలో పార్లమెంటులోని కాంప్లెక్స్‌లో భేటీ అయిన.. 17 పార్టీలకు చెందిన నేతలు.. ఈ విషయంలో కేంద్రాన్ని ఇరుకున పెట్టాలని నిర్ణయించారు.
భారత్-చైనా బలగాల మధ్య జరిగిన ఘర్షణపై పార్లమెంట్‌లో రాజ్‌నాథ్‌ సింగ్ చేసిన ప్రకటనపై వివరణ ఇవ్వాలని.. దీనిపై అత్యవసరంగా చర్చ చేపట్టాలని ప్రతిపక్షాలు డిమాండ్ చేస్తున్నాయి. మెుత్తం 17 పార్టీలకు చెందిన నేతలు ఈ భేటీకి హాజరుకాగా టీఎంసీ గైర్హాజరైంది. అయితే కొన్ని అనివార్య కారణాల వల్ల హాజరు కాలేదని పేర్కొన్న ఆ పార్టీ.. విపక్షాలన్నీ కలిసి తీసుకున్న నిర్ణయానికి కట్టుబడి ఉంటామని తెలిపింది. చైనా విషయంలో ఉమ్మడి ప్రకటన చేయాలని నిర్ణయించిన విపక్షాలు.. సైన్యాన్ని ఎక్కడా తక్కువ చేయకూడదని నిర్ణయించాయి. గురువారం మరోసారి అన్ని పార్టీలు పార్లమెంట్‌లో సమావేశమై తదుపరి కార్యాచరణను ఖరారు చేయాలని నిర్ణయించుకున్నాయి.
