Old Man Raped Girl : ఉత్తర్ప్రదేశ్ అలీగఢ్లో దారుణం జరిగింది. 12 ఏళ్ల దళిత బాలికపై అత్యాచారానికి పాల్పడ్డాడు 66 ఏళ్ల వృద్ధుడు. దీనిపై కేసు నమోదు చేసుకున్న పోలీసులు నిందితుడిని అరెస్ట్ చేశారు. కాగా బాలిక ఆరోగ్య పరిస్థితి విషమంగా ఉందని వైద్యులు తెలిపారు.
ఇదీ జరిగింది
నిందితుడు హర్దువాగంజ్ పట్టణంలో కుట్టు మెషీన్లు రిపేర్ చేస్తూ జీవిస్తున్నాడు. బాలిక సైతం అదే ప్రాంతంలో తండ్రి, నానమ్మతో కలిసి నివసిస్తోంది. తల్లి కొన్నేళ్ల క్రితమే చనిపోవడం వల్ల తండ్రి ఫ్యాక్టరీలో పనిచేస్తూ బాలికను పెంచుతున్నాడు. ఈ క్రమంలోనే గురువారం బాలిక ఇంటి బయట ఆడుకుంటుండగా, రూ.100 ఇస్తానంటూ ఆమెకు ఆశ పెట్టాడు నిందితుడు. అనంతరం బాలికను నిర్మానుష్య ప్రాంతానికి తీసుకెళ్లి అత్యాచారం చేశాడు. బాలిక అస్వస్థతకు గురికావడం వల్ల ఇంటికి పంపించాడు. బాలిక అనారోగ్యానికి గురైందన్న విషయాన్ని గ్రహించి కుటుంబసభ్యులు ఆరా తీయగా ఆమె అసలు విషయం చెప్పింది. దీంతో నిందితుడిపైపై పోలీసులకు ఫిర్యాదు చేసి బాలికను ఆస్పత్రికి తరలించారు. ప్రస్తుతం బాలిక ఆరోగ్య పరిస్థితి విషమంగా ఉందని వైద్యులు తెలిపారు.
హోటల్లో బాలికపై గ్యాంగ్ రేప్
బాలికపై సామూహిక అత్యాచారానికి పాల్పడిన మరో ఘటన అలీగఢ్లో జరిగింది. బాలికను నమ్మించిన ఓ యువకుడు హోటల్కు తీసుకువచ్చాడు. అనంతరం తన స్నేహితుడితో కలిసి అత్యాచారం చేశాడు. హోటల్ సిబ్బంది సమాచారంతో ఘటనా స్థలానికి చేరుకున్న పోలీసులు ఇద్దరు నిందితులను అరెస్ట్ చేశారు. దీనిపై కేసు నమోదు చేసుకుని దర్యాప్తు చేపట్టారు. అనంతరం బాలికను వైద్య చికిత్స కోసం ఆస్పత్రికి తరలించారు.
షూటింగ్ కోసం వచ్చిన మోడల్పై రేప్
హిమాచల్ప్రదేశ్ రాజధాని శిమ్లాలో దారుణం జరిగింది. షూటింగ్ కోసం వచ్చిన ఓ మోడల్ను రేప్ చేశాడు ఓ వ్యక్తి. పంజాబ్ జలంధర్కు చెందిన 23 ఏళ్ల యువతి షూటింగ్ కోసం శిమ్లాకు వచ్చింది. హోటల్ రూమ్లో ఉండగా ఓ వ్యక్తి తనపై అత్యాచారానికి పాల్పడినట్లు ఫిర్యాదు చేసింది యువతి. దీనిపై కేసు నమోదు చేసుకున్న పోలీసులు నిందితుడి కోసం గాలింపు చర్యలు చేపట్టారు. ఈ ఘటన డిసెంబర్ 22న జరగ్గా ఆలస్యంగా వెలుగులోకి వచ్చింది.
