ఒడిశాలో మరో రైలు పట్టాలు తప్పింది. శుక్రవారం నాటి ఘోర విషాదాన్ని మరువకముందే మరో రైలు ప్రమాదానికి గురైంది. సున్నపురాయితో వెళ్తున్న గూడ్స్ రైలు బార్గఢ్ వద్ద పట్టాలు తప్పినట్లు అధికారులు తెలిపారు. ఐదు బోగీలు పట్టాలు తప్పి.. పక్కకు వెళ్లిపోయినట్లు వెల్లడించారు. న్యారో గేజ్ లైన్పై ఈ ఘటన జరిగిందని తెలిపారు. ఈ ఘటనలో ఎవరూ ప్రాణాలు కోల్పోలేదని అధికారులు స్పష్టం చేశారు. ఘటనాస్థలికి పోలీసులు చేరుకొని.. సహాయక చర్యలు చేపట్టారు.
'రైల్వే శాఖకు సంబంధం లేదు'
పట్టాలు తప్పిన గూడ్స్ రైలును ఓ ప్రైవేటు సిమెంట్ ఫ్యాక్టరీ నడిపిస్తోందని ఈస్ట్ కోస్ట్ రైల్వే తెలిపింది. మెందపాలి ప్రాంతంలో ఉన్న ఫ్యాక్టరీ ప్రాంగణంలోనే రైలు పట్టాలు తప్పిందని వివరించింది. దానితో రైల్వే శాఖకు ఎలాంటి సంబంధం లేదని తెలిపింది.
"డుంగ్రీ సున్నపురాయి గనుల నుంచి ఏసీసీ బార్గఢ్ సిమెంట్ ప్లాంట్ వరకు ప్రైవేటు న్యారో గేజ్ రైల్వే లైన్ ఉంది. ఈ రైలు పట్టాల నిర్వహణ, బోగీలు, లోకో పైలట్ల బాధ్యత అంతా ప్రైవేటు కంపెనీయే చూసుకుంటుంది. ఈ రైలు.. భారతీయ రైల్వే వ్యవస్థకు అనుసంధానమైనది కాదు. ఈ ఘటనకు ఏ విధంగానూ రైల్వే శాఖకు సంబంధం లేదు."
-ఈస్ట్ కోస్ట్ రైల్వే
రైలుకు పగుళ్లు.. తప్పిన ప్రమాదం!
తమిళనాడులో ఓ రైలు త్రుటిలో ప్రమాదం నుంచి తప్పించుకుంది. కొల్లం జంక్షన్- చెన్నై ఎగ్మోర్ ఎక్స్‌ప్రెస్‌లోని ఓ బోగీ కింది భాగంలో ఏర్పడిన పగుళ్లను తమిళనాడులోని సెంగోట్టై రైల్వే స్టేషన్‌లో గుర్తించడం వల్ల పెను ప్రమాదం తప్పింది. రైల్వే సిబ్బంది అప్రమత్తతతో ప్రమాదం తప్పినట్లు దక్షిణ రైల్వే అధికారులు పేర్కొన్నారు. పగుళ్లను గుర్తించిన రైల్వే సిబ్బంది ఆ బోగీని తొలగించి మధురైలో ప్రత్యామ్నాయంగా మరో బోగీని జోడించారు. చెన్నై- ఎగ్మోర్ ఎక్స్‌ప్రెస్‌లోని ఎస్‌ త్రీ బోగీలో పగుళ్లను క్యారేజ్ వ్యాగన్ సిబ్బంది గుర్తించినట్లు అధికారులు తెలిపారు. పగుళ్లను గుర్తించిన సిబ్బందిని సత్కరించి.. అవార్డును అందజేయనున్నట్టు దక్షిణ రైల్వే అధికారులు వెల్లడించారు.
మాటలకు అందని విషాదం
ఒడిశాలో శుక్రవారం ఘోర ప్రమాదం జరిగింది. మూడు రైళ్లు ప్రమాదానికి గురై ఈ ఘటనలో 275 మంది ప్రాణాలు కోల్పోయారు. వెయ్యి మందికి పైగా గాయపడ్డారు. చెన్నై వైపు వెళ్తున్న కోరమాండల్ రైలు.. ప్రధాన లైన్ నుంచి కాకుండా లూప్లైన్లోకి వెళ్లడం ప్రమాదానికి కారణమైంది. లూప్లైన్లో ఉన్న గూడ్స్ రైలును కోరమాండల్ ఢీకొట్టింది. దీంతో కోరమాండల్ బోగీలు పట్టాలపై చెల్లాచెదురుగా పడిపోయాయి. ఆ బోగీలను బెంగళూరు-హవ్డా సూపర్ఫాస్ట్ ఢీకొట్టడంతో ప్రమాద తీవ్రత మరింత పెరిగింది.
