క్రిమిసంహారక మందులు అవసరం లేకుండా కీటకాల నుంచి పంటలను కాపాడేందుకు అధునాతన పరికరాన్ని తయారు చేశారు ఒడిశా కటక్లోని ఐకార్-జాతీయ ధాన్య పరిశోధనా సంస్థలో పనిచేసే శాస్త్రవేత్తలు. పూర్తిగా సౌరశక్తితో పనిచేసేలా ఈ పరికరాన్ని అభివృద్ధి చేశారు. ఈ నూతన ఆవిష్కరణకు పేటెంట్ హక్కులను సైతం పొందారు. ఈ పరికరం ద్వారా రైతులు.. తమ పంట పొలాల్లో ఎలాంటి క్రిమికీటకాలు ఉన్నాయో గుర్తించి.. వాటిబారి నుంచి పంటలను కాపాడుకోవచ్చని శాస్త్రవేత్తలు వివరించారు.
"అధునాతన సాంకేతికతను జోడించి రెండు రకాల ఆల్టర్నేట్ ఎనర్జీ లైట్ ట్రాప్ (ఏఈఎల్టీ) పరికరాలను తయారు చేశాం. రూ.8,800 ఖర్చుతో తయారు చేసిన ఈ పరికరంతో ఒక హెక్టార్ పరిధిలోని పంటను క్రిమికీటకాలను నుంచి కాపాడవచ్చు. ఈ పరికరంలో మినీ వర్షన్ కూడా ఉంది. రూ. 4,100 ఖర్చుతో చేసిన ఈ పరికరం ఒక ఎకరం పంటను రక్షిస్తుంది. మేము మహారాష్ట్రకు చెందిన కంపెనీతో పేటెంట్ హక్కులను పంచుకున్నాం. పరికరాల ఉత్పత్తిని త్వరలో ప్రారంభిస్తాం."
-- డా. శ్యామ్రంజన్ దాస్ మోహపాత్ర, సీనియర్ శాస్త్రవేత్త
ఈ అధునాతన విధానంతో ప్రపంచవ్యాప్తంగా వేలకోట్ల విలువగల పంటలను క్రిమికీటకాల బారి నుంచి రక్షించవచ్చని సీనియర్ శాస్త్రవేత్త మోహపాత్ర తెలిపారు.
ఎలా పనిచేస్తుంది?
ఆల్టర్నేట్ ఎనర్జీ లైట్ ట్రాప్(ఏఈఎల్టీ) పరికరం పంట పొలంలో ఏర్పాటు చేస్తారు. ఇందులో లైట్ ట్రాప్ పరికరం ఉంటుంది. ఈ పరికరం కీటకాలను ఆకర్షిస్తుంది. ఈ పరికరంపై వాలిన కీటకాలను కలెక్టర్ అనే పరికరం లోపలికి తీసుకుంటుంది.
ఈ పరికరం తక్కువ ధరకే లభిస్తుందని శాస్త్రవేత్త మోహపాత్ర తెలిపారు. ఈ విధానం పర్యావరణ రహితమని వివరించారు.
ఇదీ చదవండి: 28 గంటలు మంత్రాలు జపించి మహిళ ప్రపంచ రికార్డు
