Nirmala Sitharaman Forbes : కేంద్ర ఆర్థిక మంత్రి నిర్మలా సీతారామన్కు ఇంకోసారి అరుదైన గౌరవం దక్కింది. ఈ ఏడాదికి గానూ ఫోర్బ్స్ విడుదల చేసిన ప్రపంచంలోనే అత్యంత శక్తిమంతమైన 100 మంది మహిళల జాబితాలో ఆమెకు వరుసగా ఐదోసారి చోటు దక్కింది. భారత్ నుంచి మొత్తం నలుగురు మహిళలకు చోటు లభించగా వారిలో నిర్మలా సీతారామన్ తొలి స్థానంలో నిలిచారు. ప్రపంచవ్యాప్త జాబితాలో ఆమె 32వ స్థానంలో ఉన్నారు. గతేడాది 36వ స్థానంతో సరిపెట్టుకున్నారు.
నిర్మలా సీతారామన్ తర్వాత భారత్ నుంచి హెచ్‌సీఎల్ కార్పొరేషన్‌ ఛైర్‌పర్సన్ రోష్నీ నాడార్‌ మల్హోత్రా 60వ స్థానంలో, సెయిల్ ఛైర్‌పర్సన్ సోమా మోండల్‌ 70వ స్థానంలో నిలిచారు. బయోకాన్‌ వ్యవస్థాపకురాలు కిరణ్‌ మజూందర్‌ షా 76వ స్థానంలో ఉన్నారు. వీరికి కూడా వరుసగా ఈ ఏడాది ఫోర్బ్స్ జాబితాలో చోటు దక్కింది.
ప్రపంచవ్యాప్తంగా శక్తిమంతమైన మహిళల జాబితాలో యూరోపియన్‌ కమిషన్‌ చీఫ్‌ ఉర్సులా వాన్‌ దెర్‌ లెయెన్‌ తొలి స్థానాన్ని కైవసం చేసుకున్నారు. రెండో స్థానంలో యూరోపియన్‌ సెంట్రల్‌ బ్యాంక్‌ అధిపతి క్రిస్టినా లగార్డ్‌, మూడో స్థానంలో అమెరికా ఉపాధ్యక్షురాలు కమలా హారిస్‌ ఉన్నారు. వరుసగా నాలుగు, ఐదు స్థానాల్లో ఇటలీ ప్రధాని జార్జియా మెలోని, అమెరికా గాయని టేలర్‌ స్విప్ట్‌ చోటు సంపాదించారు.
పూర్తి స్థాయి ఆర్థిక మంత్రిగా..
దేశంలో తొలి, పూర్తి స్థాయి ఆర్థిక మంత్రిగా నిర్మలా సీతారామన్ కొనసాగుతున్నారు. రాజకీయాల్లోకి అడుగుపెట్టకముందు బ్రిటన్‌ అగ్రికల్చర్‌ ఇంజినీర్స్‌ అసోసియేషన్‌తో పాటు బీబీసీ వరల్డ్‌ సర్వీస్‌లలో కీలక బాధ్యతలు చేపట్టారు. ప్రస్తుతం కేవలం ఆర్థిక శాఖయే కాకుండా కార్పొరేట్ వ్యవహారాల మంత్రిగా కూడా ఆమె వ్యవహరిస్తున్నారు. జాతీయ మహిళా కమిషన్‌లో సభ్యురాలిగానూ ఉన్నారు.
గతేడాది ఇలా..
ఇక ఈ ఏడాది ఫోర్బ్స్ ప్రకటించిన ప్రపంచంలోనే అత్యంత శక్తిమంతమైన మహిళల జాబితాలో హెచ్‌సీఎల్ ఛైర్‌పర్సన్ రోష్నీ నాడార్‌ మల్హోత్రా 60వ స్థానాన్ని దక్కించుకోగా గతేడాది ఈ జాబితాలో ఆమె 53వ స్థానంలో నిలిచారు. సెయిల్ ఛైర్‌పర్సన్ సోమా మోండల్‌కు గతేడాది 67వ స్థానం దక్కింది. బయోకాన్‌ వ్యవస్థాపకురాలు కిరణ్‌ మజూందర్‌ షాకు గతేడాది 72వ ర్యాంక్ వరించింది.
అసెంబ్లీ ఎన్నికల్లో విజయం- 10 మంది ఎంపీలు రాజీనామా- ఎవరెవరంటే?
పార్ట్టైమ్ జాబ్ పేరుతో మోసాలు- 100కు పైగా వెబ్సైట్లను బ్లాక్ చేసిన కేంద్రం
