NEET PG Counselling: నీట్ పీజీ ప్రవేశాలకు మార్గం సుగమమైంది. 2021-22 ఏడాది నీట్ పీజీ కౌన్సెలింగ్కు అనుమతిస్తూ సుప్రీంకోర్టు మధ్యంతర ఉత్తర్వులు జారీ చేసింది. దేశవ్యాప్తంగా ఉన్న వైద్య విద్య సీట్లలో.. ప్రస్తుతం ఉన్న రిజర్వేషన్ల ప్రకారమే నిర్వహించాలని స్పష్టం చేసింది. దీని ప్రకారం.. ఓబీసీలకు 27శాతం, ఈడబ్ల్యూఎస్ కేటగిరీకి 10శాతం రిజర్వేజన్ కొనసాగనుంది.
జస్టిస్ డీవై చంద్రచూడ్, జస్టిస్ ఏఎస్ బోపన్నల ధర్మాసనం నీట్-పీజీ కౌన్సెలింగ్, ఓబీసీ కోటాలపై దాఖలైన పిటిషన్లపై విచారణ చేపట్టింది. మధ్యంతర ఉత్తర్వులు ఇచ్చేందుకు పూర్తి కారణాలను తెలియజేస్తామని పేర్కొంది. ఇప్పటికే ఉన్న ప్రక్రియ ప్రకారమే 2021-22 నీట్ పీజీ కౌన్సిలింగ్ నిర్వహించాలని సూచించింది.
ఈడబ్ల్యూఎస్ అభ్యర్థులు వార్షిక ఆదాయం రూ.8లక్షలుగా నిర్ణయించటంపై తుది తీర్పులో నిర్ణయం తీసుకుంటామని పేర్కొంది ధర్మాసనం. ఈ అంశంపై దాఖలైన పిటిషన్ల విచారణను మార్చ్ 5న చేపట్టనున్నట్లు స్పష్టం చేసింది. అదే రోజు తుది తీర్పు వెలువరిస్తామని తెలిపింది.
