Highway works stopped for saving Python Eggs: కొండచిలువ గుడ్లను సంరక్షించేందుకు జాతీయ రహదారి పనులను ఏకంగా 54 రోజుల పాటు నిలిపివేసింది ఉరలుంగాల్ లేబర్ కాంట్రాక్ట్ కోఆపరేటివ్ సొసైటీ (యూఎల్సీసీ). ఈ సంఘటన కేరళలోని కాసర్గోడ్లో జరిగింది. 54 రోజుల పాటు జాగ్రత్తగా సంరక్షించిన అనంతరం.. మొత్తం 24 గుడ్ల నుంచి చిన్న పాము పిల్లలు బయటకు వచ్చాయి.
రహదారి విస్తరణ పనులు చేపడుతున్న క్రమంలో ఓ పైథాన్, దాని గుడ్లను ఓ మట్టి రంధ్రంలో కనుగొన్నారు యూఎల్సీసీ కార్మికులు. దీంతో ఆ గుడ్లను కాపాడేందుకు పనులను నిలిపివేశారు. అటవీ అధికారులు ఆ ప్రాంతానికి చేరుకొని పాము గుడ్లు పెడుతున్నట్లు గుర్తించారు. అయితే ఈ దశలో గుడ్లను అక్కడి నుంచి తరలిస్తే పాడైపోతాయని.. రోడ్డు పనులనే ఆపాలని యూఎల్సీసీ నిర్ణయించింది.
ఈ గుడ్లకు నష్టం జరిగితే సంస్థ చట్టపరమైన ఇబ్బందులు ఎదుర్కోవాల్సి వస్తుందని కాసర్గోడ్ డీఎఫ్ఓ ధనేశ్ కుమార్ తెలిపారు. కొండచిలువలు.. వన్య ప్రాణుల సంరక్షణ చట్టంలోని షెడ్యూల్ 1 కిందకు వస్తాయని, వాటికి ఏదైనా హాని జరిగితే కేసులను ఎదుర్కోవాల్సి ఉంటుందని వెల్లడించారు.
ఈ నేపథ్యంలోనే అటవీ శాఖ సర్టిఫై చేసిన పాముల సంరక్షుడు అమీన్.. గుడ్ల ఆరోగ్యాన్ని రోజూ పర్యవేక్షిస్తూ వచ్చారు. గుడ్లపై పగుళ్లు ఏర్పడిన అనంతరం అవి పొదిగినట్లు భావించి.. వాటిని అమీన్ ఇంటికి తరలించారు. అక్కడ వాటిని ఓ అట్టపెట్టెలో పెట్టారు. 54 రోజుల పాట ఎంతో జాగ్రత్తగా చూసుకున్న తర్వాత మొత్తం 24 గుడ్లు పొదిగాయి. ఆ పాము పిల్లలను అటవీ అధికారులు అడవిలో వదిలేశారు.
ఇదీ చూడండి: మర్మాంగాన్ని కొరికిన కొండచిలువ- బాత్రూంలో ఉండగా..
