Jignesh Mevani On BJP: గుజరాత్ శాసనసభ్యుడు జిగ్నేశ్ మేవాణి భాజపా ప్రభుత్వంపై తీవ్ర విమర్శలు చేశారు. తనను అసోం పోలీసులు అరెస్ట్ చేయాలని ప్రధానమంత్రి కార్యాలయ కుట్ర పన్నిందని ఆరోపించారు. త్వరలో జరగనున్న గుజరాత్ శాసనసభ ఎన్నికలను దృష్టిలో పెట్టుకొనే తనను అరెస్ట్ చేశారని.. దీనిని '56 అంగుళాల పిరికిపంద చర్య'గా ఆయన అభివర్ణించారు. సాహసోపేత నిర్ణయాలు తీసుకోవాలంటే 56 అంగుళాల ఛాతి ఉండాలంటూ గతంలో నరేంద్ర మోదీ చేసిన వ్యాఖ్యలను ఉద్దేశించి ఇలా అన్నారు జిగ్నేశ్.
'మహాత్మా దేవాలయం'గా భావించే గుజరాత్లో శాంతి సామరస్యం కోసం మోదీ పిలుపునివ్వాలనే తాను ట్వీట్ చేశానని చెప్పారు. వారు గాడ్సే భక్తులు కాకపోతే ఎర్రకోట నుంచి 'గాడ్సే ముర్దాబాద్' అనాలని సవాల్ చేశారు. తీవ్రవాది అని ట్వీట్ చేసినందుకు తనను అరెస్ట్ చేయడంలో భాజపాకు ప్రయోజనం లేదని.. గుజరాత్ ఎన్నికల్ని దృష్టిలో పెట్టుకొనే కుట్ర పన్నారని పేర్కొన్నారు. ఇది ప్రజాస్వామ్యానికి చాలా ప్రమాదకరం అని మేవాణి అన్నారు.
గుజరాత్లో పట్టుబడిన రూ.1.75 లక్షల కోట్ల విలువైన డ్రగ్స్, 22 పరీక్ష పత్రాల లీక్కు కారకులపై చర్యలు తీసుకోవాలని డిమాండ్ చేశారు. రాష్ట్రంలోని సమస్యలను పరిష్కరించాలని కోరుతూ.. జూన్1న వీధుల్లోకి వచ్చి గుజరాత్ బంద్ను నిర్వహిస్తానని మేవాణి ప్రకటించారు. మైనారిటీలు, దళితులపై పెట్టిన అక్రమ కేసులను ఉపసంహరించుకోవాలని కోరారు. తన అరెస్టు చేయాలని అసోం పోలీసులు కుట్ర పన్నారని.. శాసనసభ్యుడిగా తన ప్రోటోకాల్ నిబంధనలను తుంగలో తొక్కారని ఆరోపించారు.
తన అరెస్ట్ విషయం తెలియదన్న అసోం ముఖ్యమంత్రి హిమంత బిశ్వ శర్మ వాదనపై మేవాణి స్పందించారు. అసోం ముఖ్యమంత్రికి తన అరెస్ట్ గురించి తెలియకపోవడం అసాధ్యమని.. ఆయన రాజకీయ గురువుల సూచనతోనే తనపై కేసులు నమోదు చేశారని చెప్పారు. తనపై ఫిర్యాదు చేయమని మహిళా పోలీసులపై ఉన్నతాధికారులే ఒత్తిడి తెచ్చారని.. ఆమెపై ఎలాంటి వ్యాఖ్యలు చేయనన్నారు.
ఇదీ చదవండి: ప్రత్యక్ష రాజకీయాల్లోకి ప్రశాంత్ కిశోర్! టార్గెట్ 2024!!
