కుటుంబ సభ్యుల మీద అలిగి ఇంట్లో నుంచి వెళ్లిపోయిన ఓ కుర్రాడు.. సుమారు పన్నెండేళ్ల తరువాత తన వారిని కలుసుకున్నాడు. పుష్కర కాలం పాటు కొడుకు కోసం వేచి చూసిన ఆ అమ్మ అతని స్పర్శతో పులకరించిపోయింది. కుమారుడ్ని మనసారా హత్తుకుని ఏళ్ల నాటి బాధను మరిచిపోయింది. తల్లిదండ్రుల పాదాలకు నమస్కరించి.. మళ్లీ ఇంటి నుంచి వెళ్లిపోను అని చెప్పాడు ఆ యువకుడు.
ఏం జరిగింది అంటే..?
ఉత్తర్ప్రదేశ్లోని సోన్భద్ర జిల్లాకు చెందిన ములాయం సింగ్ 13 ఏళ్ల వయసులో కుటుంబ సభ్యులతో గొడవపడి 12 సంవత్సరాల క్రితం ఇంటి నుంచి వెళ్లి పోయాడు. ఈ పుష్కరకాలంలో వివిధ ప్రాంతాలను తిరిగిన ఆ కుర్రాడు.. చివరకు పంజాబ్లోని అమృత్సర్ చేరుకున్నాడు. అప్పటికే అతని మానసిక స్థితి సరిగా లేదు. వింత చేష్టలు, అర్థంకాని పాటలు పాడుతుండే వాడు. అయితే దీనినంతటినీ పంజాబ్ పోలీసు శాఖలో ఏఎస్ఐగా పని చేస్తున్న సుఖ్విందర్ సింగ్ గమనించారు. ఎలా అయినా సరే ఆ యువకుడ్ని తల్లిదండ్రుల దగ్గరకు పంపాలని నిర్ణయించుకున్నారు. తెలిసిన కొందరు సామాజిక కార్యకర్తల సాయంతో అతని చిరునామా కనుగొన్నారు. ములాయంను అతడి సొంత ఊరు అయిన సోన్భద్ర జిల్లా బహర్ గ్రామానికి తీసుకుని వచ్చి తల్లిదండ్రులకు అప్పజెప్పారు.
కుమారుడ్ని చూసిన వెంటనే తల్లిదండ్రులు తన్మయత్వానికి లోనయ్యారు. దగ్గరకు తీసుకుని ఆలింగనం చేసుకున్నారు. తమ కుమారుడ్ని అప్పగించిన ఏఎస్ఐ సుఖ్‌విందర్కు ధన్యవాదాలు తెలిపారు. ములాయంను వారి అమ్మానాన్నలతో కలపడం చాలా ఆనందాన్ని ఇచ్చిందని ఏఎస్ఐ సుఖ్విందర్ అన్నారు.
ఇవీ చూడండి:
కొనఊపిరితో చిన్నారి.. పనిచేయని ఆక్సిజన్ యంత్రం.. డాక్టర్ ఐడియాతో...
గర్భిణీకి అరుదైన సర్జరీ.. కడుపులో నుంచి అరకిలో రాయిని తొలగించి..
