మధ్యప్రదేశ్ మంద్సౌర్కు చెందిన ఓ మహిళా రైతు.. హెలికాప్టర్ కొనేందుకు రుణం మంజూరు చేయాలని కోరుతూ ఏకంగా రాష్ట్రపతి రామ్నాథ్ కోవింద్కు లేఖ రాశారు. అంతేకాదు.. ఆ హెలికాప్టర్ నడిపేందుకు లైసెన్స్ ఇప్పించాలని కూడా అందులో పేర్కొన్నారు బసంతి బాయి లోహర్.
బసంతికి శ్యామ్గఢ్ మండలం ఆగర్ గ్రామంలో కొంత సాగు భూమి ఉంది. ఇందులో వ్యవసాయం చేసుకుంటూ ఆ కుటుంబ జీవనం సాగిస్తోంది. అయితే.. వారి పొలానికి వెళ్లే అన్ని మార్గాలను ఆ ఊరి పెద్దైన పర్మానంద్ పాటిదర్, అతని కుమారుడు లవకుశ కలిసి ఇటీవల మూసివేయించారు. ఈ సమస్యకు పరిష్కారం చూపాలని కోరుతూ.. స్థానిక అధికారులకు పలుమార్లు మొరపెట్టుకున్నారట బసంతి. అయినా ఫలితం లేకపోయింది. ఇక చేసేదేమీ లేక.. రాష్ట్రపతికి తమ గోడును విన్నవించుకున్నట్టు చెప్పుకొచ్చారా మహిళా రైతు.
"మా పొలం సమస్యను పరిష్కరించాలని కోరుతూ ప్రభుత్వ కార్యాలయాల చుట్టూ ఎన్నోసార్లు తిరిగాం. అయినప్పటికీ వారి నుంచి ఎలాంటి స్పందన లేదు. ఇక వేరే దారి కనిపించనందున.. ఈ సమస్యకు పరిష్కారంగా ఓ హెలికాప్టర్ కొనేందుకు రుణం ఇప్పించాలని రాష్ట్రపతిని కోరాం. దాన్ని నడిపేందుకు లైసెన్స్ మంజూరు చేయాలనీ అభ్యర్థించాం."
- బసంతి బాయి లోహర్, రైతు
ఇదీ చదవండి: అప్పు తీర్చలేదని బంధువుల అమానవీయ దాడి
