మతస్వేచ్ఛ బిల్లుకు మధ్యప్రదేశ్ కేబినెట్ ఆమోదముద్ర వేసింది. ఈ బిల్లు అమలులోకి వస్తే మోసపూరిత వివాహాలు, ఇతర మార్గాల ద్వారా మతమార్పిడులకు పాల్పడేవారికి 10 ఏళ్ల వరకు శిక్ష పడుతుంది. అంతేగాక రూ. లక్ష వరకు జరిమానా విధించే అవకాశం లభిస్తుంది.
ఈ బిల్లు అమలులోకి వస్తే దేశంలో మత మార్పిడులకు వ్యతిరేకంగా రూపొందిన పటిష్ఠ చట్టంగా నిలుస్తుందని మధ్యప్రదేశ్ హోంమంత్రి నరోత్తమ్ మిశ్రా పేర్కొన్నారు. 1968 మత స్వేచ్ఛ చట్టం స్థానంలో ఇది అమలులోకి వస్తుందని చెప్పారు. ఈ బిల్లును అసెంబ్లీలో ప్రవేశపెట్టనున్నట్లు తెలిపారు.
ఈ చట్టం ప్రకారం మోసపూరితంగా జరిగిన వివాహాన్ని చెల్లనిదిగా పరిగణనలోకి వస్తుందని చెప్పారు మిశ్రా. మతాన్ని మార్చుకోవాలని అనుకునేవారు జిల్లా ప్రభుత్వ అధికారుల వద్ద దరఖాస్తు చేసుకొనేలా ఓ నిబంధన జోడించినట్లు వివరించారు.
యూపీ ఆర్డినెన్సుకు నెలరోజులు
మరోవైపు, ఉత్తర్ప్రదేశ్ తీసుకొచ్చిన ఇదే తరహా 'లవ్ జిహాద్' ఆర్డినెన్సుకు నెల రోజులు నిండాయి. నవంబర్ 27న అమలులోకి వచ్చిన ఆర్డినెన్సు ఆధారంగా... 12 ఎఫ్ఐఆర్లు నమోదయ్యాయి. బలవంతంగా మత మార్పిడులకు సంబంధించి 35 మందిని అరెస్టు చేశారు పోలీసులు. ఆర్డినెన్సు అమలులోకి వచ్చిన తర్వాతి రోజే బరేలీలో ఓ కేసు వెలుగులోకి వచ్చింది.
ఇదీ చదవండి: ప్రాథమిక హక్కుపైనా ఉక్కుపాదం?
అయితే, యోగి సర్కార్ తీసుకొచ్చిన ఆర్డినెన్సుపై భిన్నాభిప్రాయాలు వ్యక్తమవుతున్నాయి. పలువురు దీన్ని సమర్థిస్తుండగా.. మరికొందరు వ్యతిరేకిస్తున్నారు. ఈ ఆర్డినెన్సుకు వ్యతిరేకంగా అలహాబాద్ హైకోర్టులో ప్రజాప్రయోజన వ్యాజ్యం సైతం దాఖలైంది.
లవ్ జిహాద్ అంటే..
ఇటీవలి కాలంలో పలు భాజపా పాలిత రాష్ట్రాలు ఈ తరహా చట్టాలు తీసుకొస్తున్నట్లు ప్రకటించాయి. ప్రేమ, పెళ్లి పేరిట హిందూ మహిళలను బలవంతంగా ఇస్లాం మతంలోకి మారేలా చేస్తున్నారని, వాటిని అరికట్టేందుకు ఈ ఆర్డినెన్సులు ఉపయోగపడతాయని చెబుతున్నాయి. ఈ బలవంతపు మత మార్పిడులనే 'లవ్ జిహాద్'గా అభివర్ణిస్తున్నాయి.
ఇదీ చదవండి: 'లవ్ జిహాద్' అరెస్టుపై హైకోర్టు స్టే
