అనారోగ్యంతో భర్త కొంతకాలం క్రితమే చనిపోయినా 'చెట్టంత కొడుకు ఉండగా నాకేంటి'.. అని ఆ తల్లి ధీమాగా ఉండేది. కొడలు, మనవరాలితో జీవితం హాయిగా గడిచిపోతున్న సమయంలో ఆమెకు కోలుకోలేని ఎదురుదెబ్బ తగిలింది. తన చివరి వరకు తోడుగా ఉండి బాగోగులు చూసుకుంటాడనుకున్న కన్నకొడుకు తిరిగిరాని లోకాలకు వెళ్లిపోయాడు. భర్త కూడా లేకపోవడం వల్ల ఆ అంత్యక్రియలు ఆమెనే నిర్వహించాల్సి వచ్చింది. బరువెక్కిన గుండెతో విలపిస్తూ చితికి నిప్పు పెట్టింది. ఈ హృదయ విదారక ఘటన ఉత్తర్ప్రదేశ్ జౌన్పుర్లోని కొత్వాలీ ప్రాంతంలో జరిగింది.
సామాజిక కార్యకర్త అయిన అంజూ పాఠక్.. 32 ఏళ్ల తన కుమారుడు హిమాన్షు, అతని భార్య, కుమార్తెలతో కలిసి నివసిస్తోంది. అయితే ఇటీవల లఖ్నవూ వెళ్లిన హిమాన్షు రోడ్డు ప్రమాదానికి గురయ్యాడు. ఆసుపత్రిలో చికిత్స పొందుతుండగా పరిస్థితి విషమించడం వల్ల ప్రాణాలు కోల్పోయాడు. అయితే చికిత్స సమయంలో ఇచ్చిన మందులు దుష్ప్రభావం చూపాయని.. అది కాస్త లివర్ చెడిపోయేందుకు దారి తీసిందని బంధువులు ఆరోపించారు. ఆ కారణంగానే అతను ప్రాణాలు కోల్పోయాడని చెప్పుకొచ్చారు. ఆచారం ప్రకారం ఇంటిలో మగవారు ఎవరూ లేకపోవడం వల్ల తల్లే ఈ అంత్యక్రియలు చేయాల్సి వచ్చిందని తెలిపారు. అంజూ హిమాన్షు చితికి నిప్పు పెడుతున్న ఫొటో సోషల్మీడియాలో వైరల్ కావడం వల్ల ఈ విషయం వెలుగులోకి వచ్చింది.
కిలోమీటరు వరకు..: కేరళలోని కాసరగోడ్ జిల్లాలో దయనీయ ఘటన వెలుగులోకి వచ్చింది. పులిమ్కోచి ప్రాంతంలో గోపాలన్ అనే ఓ వ్యక్తి మృతదేహాన్ని అతని నివాసానికి తరలించేందుకు కిలోమీటరుకుపైగా కాలినడకనే ఆ శవాన్ని మోస్తూ వెళ్లారు స్థానికులు. సరైన రోడ్డు లేక వాహనాల సదుపాయం అందుబాటులోకి రాకపోవడం వల్లే ఈ దుస్థితి ఏర్పడింది. దారి మధ్యన వచ్చే వాగును దాటేందుకు ఓ బ్రిడ్జిని కూడా చెక్కతో గ్రామస్థులే నిర్మించుకున్నారు. సరైన బ్రిడ్జి, రోడ్డును వేయాలని ఇప్పటికే అనేక సార్లు అధికారులకు విజ్ఞప్తి చేశామని కానీ ఎలాంటి ఫలితం లేదని స్థానికులు పేర్కొన్నారు.
ఇదీ చూడండి : 'లోదుస్తులన్నీ ఓకే చోట.. చున్నీ కూడా లేదు'.. నీట్ అభ్యర్థి తీవ్ర భావోద్వేగం
