బరువు తగ్గుతున్నామని మనస్తాపం- కాలువలో దూకి తల్లీకూతుళ్ల ఆత్మహత్య!

Mother Daughter Suicide Due To Weight Loss : బరువు తగ్గుతున్నామన్న కారణంతో తల్లీకూతుళ్లు బలవన్మరణానికి పాల్పడ్డారు. బాధితుల ఇంట్లో ఈ మేరకు ఓ సూసైడ్ నోట్​ లభ్యమైంది. బాధితులు ప్రయాణించిన స్కూటీ ఓ కాలువ వద్ద ఉండటం వల్ల, అందులో దూకి ఆత్మహత్య చేసుకుని ఉంటారని పోలీసులు భావిస్తున్నారు. డైవర్లను రంగంలోకి దించి గాలింపు చర్యలు చేపట్టారు.

Mother Daughter Suicide Due To Weight Loss : బరువు తగ్గుతున్నామని మనస్తాపానికి గురైన తల్లీకూతుళ్లు ఆత్మహత్యకు పాల్పడ్డారు. ఈ మేరకు వారి ఇంట్లో ఓ సూసైడ్​ నోట్​ లభ్యమైంది. ఇంటి నుంచి బయటకు వెళ్లిన వారి స్కూటీ ఓ కాలువ పక్కన ఉంది. దీంతో ఇద్దరూ కాలువలో దూకి ఆత్మహత్య చేసుకుని ఉంటారని పోలీసులు ప్రాథమికంగా భావిస్తున్నారు. డైవర్లను రంగంలోకి దించి మృతదేహాల కోసం గాలిస్తున్నారు. ఈ ఘటనపై కేసు నమోదు చేసుకుని దర్యాప్తు చేపట్టారు. ఈ ఘటన హరియాణాలోని కర్నాల్​లో జరిగింది.

పోలీసులు తెలిపిన వివరాల ప్రకారం..
కర్నాల్​లోని సుభాష్​ కాలనీలో నివాసం ఉంటున్న మనోజ్​ అనే వ్యక్తికి భార్య, ఇద్దరు కూమార్తెలు ఉన్నారు. పెద్ద కుమార్తెకు వివాహమైంది. భార్య మీను(55), మరో కుమార్తె మేఘ (28) ఇంటి వద్దనే ఉంటున్నారు. అయితే మంగళవారం మనోజ్​ పని నిమిత్తం బయటకు వెళ్లాడు. సాయంత్రం తిరిగి ఇంటికి వచ్చేసరికి భార్య, కుమార్తె కనిపించలేదు. దీంతో పాటు స్కూటీ కూడా లేదు. ఇద్దరూ ఏదో పనిమీద బయటకు వెళ్లి ఉంటారని భావించాడు మనోజ్​.

అర్ధరాత్రి అవుతున్నా తల్లీకూతుళ్లు ఇంటికి రాలేదు. దీంతో కాంగారు పడిన మనోజ్ ఇల్లంతా క్షుణ్ణంగా వెతకగా టేబుల్​పై ఓ నోట్ కనిపించింది. అది చూసిన మనోజ్​ దిగ్భ్రాంతికి గురయ్యాడు. బరువు తగ్గే సమస్య ఉన్నందువల్లే ఆత్మహత్య చేసుకుంటున్నట్లు ఆ నోట్​లో రాసి ఉంది. ఆ నోట్​ ప్రకారం, తల్లీకూతుళ్లు గత రెండేళ్ల నుంచి బరువు తగ్గే సమస్యతో బాధపడుతున్నారు. ఈ సమస్య గురించి ఆస్పత్రికి వెళ్లినా ప్రయోజనం లేకపోయింది. క్రమంగా వారి శరీరం బలహీనంగా మారింది. అదే ఆత్మహత్య చేసుకోవడానికి దారితీసింది. ఇక వారికి బరువు తగ్గడం సమస్య ఉందని బాధితుల కుటుంబ సభ్యులు కూడా తెలిపారు.

సూసైడ్​ నోట్ చూసిన మనోజ్​ ఆందోళన చెంది బంధువులకు, పోలీసులకు సమాచారం అందించారు. సమాచారం అందుకున్న వెంటనే రంగంలోకి దిగిన పోలీసుల, గాలింపు చర్యల్లో భాగంగా ఓ కాలువ పక్కన వారి స్కూటీ ఉండటం గమనించారు. అనంతరం విచారణలో ఆ స్కూటీ మనోజ్​దేనని తేలింది. దీంతో ఇద్దరూ కాలువలోకి దూకి ఆత్మహత్యకు పాల్పడి ఉంటారని పోలీసులు ప్రాథమికంగా భావించారు. అనంతరం సెర్చ్​ ఆపరేషన్​ కోసం డైవర్ల బృందాన్ని పిలిపించి గాలింపు చర్యలు చేపట్టారు. అయితే కాలువలో కొన్ని కిలో మీటర్ల మేర గాలించినా వారి ఆచూకీ దొరకలేదు. ఈ ఘటనపై కేసు నమోదు చేసుకున్న పోలీసులు సూసైడ్ నోట్ ఆధారంగా దర్యాప్తు చేస్తున్నారు.