వచ్చే ఏడాది జరగనున్న అసోం అసెంబ్లీ ఎన్నికలపై దృష్టి సారించింది భాజపా. ఈ నేపథ్యంలోనే కేంద్ర హోం మంత్రి అమిత్ షా.. శుక్రవారం రాత్రి రాష్ట్రానికి చేరుకున్నారు. గువాహటి అంతర్జాతీయ విమానాశ్రయానికి చేరుకున్న అమిత్ షా కు ఘనస్వాగతం లభించింది. వివిధ రంగాల జానపద కళాకారులు స్థానిక సంప్రదాయాల్లో.. నృత్యాలు చేస్తూ, పాటలు పాడుతూ స్వాగతం పలికారు.
రెండు రోజుల పాటు అసోం, మణిపుర్లో పర్యటించనున్న అమిత్ షా.. పలు అభివృద్ధి ప్రాజెక్టులను ప్రారంభించనున్నారు. గువాహటిలో రూ. 860 కోట్ల అంచనా వ్యయంతో నిర్మించ తలపెట్టిన వైద్య కళాశాల, ఆసుపత్రికి శంకుస్థాపన చేయనున్నారు. అసోం వ్యాప్తంగా 11 న్యాయ కళాశాలలను కూడా ప్రారంభించనున్నారు. సీఎం సర్బానంద సోనోవాల్.. షా తో పాటు వివిధ కార్యక్రమాల్లో పాలుపంచుకోనున్నారు.
మణిపుర్లోనూ వివిధ అభివృద్ధి పనులకు శ్రీకారం చుట్టనున్నారు. ఆదివారం సాయంత్రానికి తిరిగి దిల్లీ బయల్దేరనున్నట్లు పార్టీ ఒక ప్రకటనలో తెలిపింది.
ఎన్నికల సన్నద్ధత.. చేరికలే లక్ష్యం..
అసోం అసెంబ్లీ ఎన్నికలకు అప్పుడే సన్నద్ధత ప్రారంభించింది భాజపా. ఈ మేరకు 16 మందితో కూడిన రాష్ట్ర ఎన్నికల కమిటీని నియమించింది అధిష్ఠానం. ముఖ్యమంత్రి సోనోవాల్, ఈశాన్య ప్రజాస్వామ్య కూటమి కన్వీనర్ హిమంత బిశ్వ శర్మ, రాష్ట్ర భాజపా అధ్యక్షుడు రంజీత్ కుమార్ దాస్ ఇందులో ఉన్నారు. ఇంకా 17 మంది సభ్యులతో కోర్ కమిటీ, ఐదుగురితో క్రమశిక్షణ చర్యల కమిటీని నియమించింది.
అసోం పర్యటనలో అమిత్ షా.. ఈ కమిటీలతో భేటీ అయ్యే అవకాశాలున్నాయి. ఇంకా రాష్ట్రంలో అధికార కూటమిలోని ఇతర పార్టీలతోనూ సమావేశం కానున్నట్లు తెలుస్తోంది.
షా పర్యటనలోనే కొంతమంది కాంగ్రెస్ అసంతృప్త నేతలు.. భారతీయ జనతా పార్టీలో చేరనున్నట్లు పార్టీ అసోం బాధ్యులు పాండా తెలిపారు. అరుణాచల్ ప్రదేశ్లో శుక్రవారం ఆరుగురు జేడీయూ నేతలు భాజపాలో చేరిన నేపథ్యంలో.. అప్రమత్తమైన కాంగ్రెస్ అత్యవసర సమావేశం ఏర్పాటుచేసింది. పార్టీ సభ్యులను అప్రమత్తం చేసింది.
ఇదీ చూడండి: 'మిషన్ 200' కోసం అమిత్ షా కొత్త స్కెచ్
