కర్ణాటకలో అసెంబ్లీ విధాన్సభ గేట్ వద్ద భారీ మొత్తంలో నగదును పోలీసులు పట్టుకున్నారు. ప్రజాపనుల శాఖ జూనియర్ ఇంజినీర్ జగదీశ్ బ్యాగ్లో రూ.10 లక్షలు లభ్యమయ్యాయి. ఈ ఘటనపై కేసు నమోదు చేసుకున్న పోలీసులు.. అతడిని అదుపులోకి తీసుకున్నారు. ఈ ఘటనపై స్పందించిన సీఎం బసవరాజ్ బొమ్మై ప్రతిపక్షాలపై తీవ్రంగా విమర్శలు గుప్పించారు.
"ఓ ఇంజనీర్ భారీ మొత్తంలో నగదును తీసుకెళ్తున్నట్లు పోలీసులు గుర్తించి.. అతడిని పట్టుకున్నారు. అతడు నగదును ఎవరికోసం ఎక్కడికి తీసుకెళ్తున్నాడు అనే కోణంలో పోలీసులు విచారణ కొనసాగిస్తున్నారు. ఈ కేసుతో సంబంధం ఉన్న వారిని కచ్చితంగా శిక్షిస్తాం. అయితే ఈ విషయంలో అవినీతి జరుగుతోందని మాపై రాష్ట్ర మాజీ సీఎం సిద్ధరామయ్య తప్పుడు ఆరోపణలు చేస్తున్నారు. ఇంతకుముందు పుట్టరంగశెట్టి కార్యాలయంలో రూ.25 లక్షలు దొరికినప్పుడు అధికారంలో ఉన్న ఆయన ఏం చర్యలు తీసుకున్నారు? నగదును తీసుకెళ్తున్నవారిని, తీసుకున్నవారిని పట్టుకున్నారా? మంత్రిని సస్పెండ్ చేశారా? ఈ విషయం గురించి ఆయన మర్చిపోయినట్లున్నారు. అందుకే మాపై ఆరోపణలు చేస్తున్నారు. బహుశా ఆయనకు మతిమరుపు ఉండవచ్చు. రూ.10 లక్షల నగదులో 40శాతం వాటా మాకు ఉంటే.. రూ.25 లక్షలు దొరికిన సమయంలో ఆయన వాటా ఎంత?"
-- బసవరాజ్ బొమ్మై, కర్ణాటక సీఎం
రాష్ట్ర అసెంబ్లీలో ప్రతి గోడ వద్ద అవినీతి జరుగుతోందని డీకే శివకుమార్ ఆరోపించారని, అయితే వారు అధికారంలో ఉన్నప్పుడే ఇలాంటి ఘటనలు జరిగాయని సీఎం బసవరాజ్ బొమ్మై విమర్శించారు. భద్రతా సిబ్బంది సమాచారంతోనే ఇంజనీర్‌ను అదుపులోకి తీసుకుని పోలీసులు విచారించిస్తున్నట్లు ఆయన తెలిపారు.
