ప్రధాని మోదీ కర్ణాటక పర్యటనలో ఓ బాలుడు భద్రతా వలయాన్ని ఛేదించుకుంటూ మోదీ మెడలో దండ వేసేందుకు రావడం చర్చనీయాంశమైంది. ప్రధాని నరేంద్ర మోదీకి తాను పెద్ద అభిమానినని, ఆయన దేవుడి లాంటి వ్యక్తి అని, అందుకే ఆయనకు దండ వేయాలనుకున్నానని ఆ బాలుడు తాజాగా చెప్పుకొచ్చాడు. నేషనల్‌ యూత్‌ ఫెస్టివల్‌ కార్యక్రమంలో పాల్గొనేందుకు కర్ణాటక వచ్చిన మోదీ హుబ్బళ్లిలో రోడ్‌ షో చేస్తుండగా ఈ ఘటన జరిగింది.
ఆరోతరగతి చదువుతున్న కునాల్‌ ధొంగడి మోదీకి వీరాభిమాని. మోదీ హుబ్బళ్లి వస్తున్నారన్న విషయం తెలుసుకున్న అతడు.. తన కుటుంబ సభ్యులతో కలిసి మోదీని చూసేందుకు వెళ్లాడు. రెండున్నర ఏళ్ల వయస్సున్న తన చిన్నాన్న కొడుక్కి ఆర్‌ఎస్‌ఎస్‌ యూనిఫాం ధరించి.. ఆ పిల్లాడితో మోదీ మెడలో దండ వేయాలని ఆ అబ్బాయి ప్లాన్‌. కానీ రోడ్‌ షో చేస్తున్న మోదీ.. అటువైపు చూడలేదు. ఈ లోగా కాన్వాయ్‌ వాళ్లను దాటి వెళ్లిపోతోంది. దీంతో వెంటనే బారికేడ్ల కింద నుంచి దూకేసి మోదీ మెడలో దండ వేసేందుకు యత్నించాడు. అది గమనించిన ప్రధాని కూడా ఆ దండను తీసుకునేందుకు చేయిపైకి ఎత్తారు. కానీ, అప్రమత్తమైన స్పెషల్‌ ప్రొటెక్షన్‌ గ్రూప్‌ సిబ్బంది.. ఆ బాలుడ్ని వెనక్కి నెట్టేసి, అక్కడున్న సివిల్‌ కానిస్టేబుళ్లకు అప్పగించారు.
వెంటనే స్థానిక పోలీసులు బాలుడితోపాటు, అతడి కుటుంబ సభ్యులను అదుపులోకి తీసుకొని విచారించారు. అయితే, దండ వేయడం వెనుక ఎలాంటి దురుద్దేశ లేకపోవడం వల్ల వాళ్లని విడిచిపెట్టారు. ఆ తర్వాత దండను పరిశీలించి ఎలాంటి ఇబ్బంది లేదని నిర్ధారించుకున్న తర్వాత దానిని మోదీకి అందించినట్లు సమాచారం. విచారణ అనంతరం కునాల్‌ తండ్రి మాట్లాడుతూ.. "పోలీసులు వాళ్ల పని వాళ్లు చేశారు. మా తప్పు ఏమీ లేదని నిర్ధారించుకున్న తర్వాత విడుదల చేశారు. ఈ విషయంలో కేంద్ర మంత్రి ప్రహ్లాద్‌ జోషి, ఇతర సీనియర్‌ భాజపా నాయకులు తమకు మద్దతుగా నిలిచారు. వాళ్లందరికీ కృతజ్ఞతలు" అని అన్నారు. ఎలాంటి దురుద్దేశం లేకపోవడం వల్ల తాము కూడా విచారణకు సహకరించామని తెలిపారు.
