థెరిసా మిషనరీల 'ఖాతాల ఫ్రీజ్'​పై రాజకీయ దుమారం

missionaries of charity bank account frozen: పేద ప్రజల కోసం మదర్​ థెరిసా స్థాపించిన మిషనరీస్ ఆఫ్​ ఛారిటీ బ్యాంకు ఖాతాలను కేంద్ర ప్రభుత్వం నిలిపివేసిందని వచ్చిన ఆరోపణలు రాజకీయ దుమారం రేపాయి. దీంతో కేంద్ర హోంశాఖ దీనిపై స్పష్టతనిచ్చింది. తాము ఖాతాలను ఫ్రీజ్ చేయలేదని తెలిపింది.

Missionaries of charity bank account frozen: మదర్​ థెరిసా పేదల కోసం స్థాపించిన మిషనరీస్ ఆఫ్​ ఛారిటీకి చెందిన అన్ని బ్యాంకు ఖాతాలను కేంద్ర ప్రభుత్వం స్తంభింపజేసిందని వచ్చిన ఆరోపణలు రాజకీయంగా తీవ్ర దుమారానికి దారి తీశాయి. ఖాతాల ఫ్రీజ్​ అంశాన్ని బంగాల్​ ముఖ్యమంత్రి మమతా బెనర్జీ ట్విట్టర్​ వేదికగా లేవనెత్తారు. కేంద్ర ప్రభుత్వం తీరుపై విమర్శలు గుప్పించారు.

"మదర్​ థెరిసా స్థాపించిన మిషనరీస్​ ఆఫ్​ ఛారిటీకి చెందిన అన్ని బ్యాంకు ఖాతాలను కేంద్రం స్తంభింపజేసిందనే వార్తను క్రిస్మస్​ రోజున వినటం దిగ్భ్రాంతికి గురి చేసింది. దీంతో వాటిల్లోని 22వేల మంది రోగులు, ఉద్యోగులు ఔషధాలు, ఆహారం లేక ఇబ్బందులు పడుతున్నారు. చట్టం ప్రధానమైనప్పటికీ, మానవతా ప్రయత్నాలలో ఎలాంటి రాజీ ఉండకూడదు."

- మమతా బెనర్జీ, బంగాల్​ ముఖ్యమంత్రి.

మమత ట్వీట్ చేసే సమయానికి కోల్​కతాలోని మిషనరీస్​ ఆఫ్​ ఛారిటీ కార్యాలయం నుంచి అధికారికంగా ఎలాంటి ప్రకటన వెలువడలేదు. అయితే, ఈ అంశాన్ని రాష్ట్ర సర్కార్ దృష్టికి ఛారిటీ సంస్థ తీసుకొచ్చినట్లు ప్రభుత్వ వర్గాలు తెలిపాయి. దీనిపై కేంద్రంతో రాష్ట్ర అధికారులు చర్చలు జరుపుతున్నట్లు పేర్కొన్నాయి.

హోంశాఖ స్పష్టత..

అయితే తాము మిషనరీస్​ ఆఫ్ ఛారిటీ​ ఖాతాలను ఫ్రీజ్ చేయలేదని కేంద్ర హోంమంత్రిత్వశాఖ స్పష్టతనిచ్చింది. సంబంధిత మిషనరీలే ఖాతాలను నిలిపివేయాలని కోరినట్లు ఎస్​బీఐ తమకు సమాచారం ఇచ్చిందని వివరణ ఇచ్చింది.

"మిషనరీస్​ ఆఫ్​ ఛారిటీ విదేశీ విరాళాల చట్టం ప్రకారం చేయాల్సిన​ రెన్యువల్ దరఖాస్తు డిసెంబర్ 25న తిరస్కరణకు గురైంది. నిబంధనలు పాటించనందుకే ఈ నిర్ణయం తీసుకోవాల్సి వచ్చింది. అయితే దరఖాస్తులను పునః​సమీక్షించాలని మాకు ఎలాంటి విజ్ఞప్తులు అందలేదు. ఈ మిషనరీల రిజిస్ట్రేషన్ గడువు అక్టోబర్​ 31తో ముగిసింది. కానీ హోంశాఖ డిసెంబర్​ 31వరకు దాన్ని పొడిగించింది. మిషనరీల బ్యాంకు ఖాతాలను కూడా కేంద్రం ఫ్రీజ్​ చేయలేదు. మిషనరీలే తమ ఖాతాలను ఫ్రీజ్​ చేయాలని ఎస్​బీఐని విజ్ఞప్తి చేశాయి.​ "

-కేంద్ర హోంమంత్రిత్వ శాఖ

మిషనరీస్​ ఆఫ్​ ఛారిటీని నోబెల్ శాంతి బహుమతి గ్రహీత, భారత రత్న మదర్ థెరిసా 1950లో స్థాపించారు.

ఖాతాలు ఫ్రీజ్​ చేయలేదు..

ఖాతాల ఫ్రీజ్​ వ్యవహారం రాజకీయంగా చర్చనీయాంశమైన నేపథ్యంలో మిషనరీస్ ఆఫ్​ ఛారిటీ దీనిపై స్పందించింది. తమ రిజిస్ట్రేషన్ సస్పెండ్ కానీ రద్దు కానీ కాలేదని వెల్లడించింది. తమకు సంబంధించిన ఖాతాలను ఫ్రీజ్ చేయాలని హోంశాఖ కూడా ఎలాంటి ఆదేశాలు ఇవ్వలేదని స్పష్టం చేసింది. ఈమేరకు అధికారికంగా ఓ ప్రకటన విడుదల చేసింది.

మిషనరీస్​ ఆఫ్​ ఛారిటీ అధికారిక ప్రకటన

ఇదీ చూడండి: ఆ లక్ష్యాన్ని గడువుకు ముందే చేరుకున్నాం: మోదీ