ఆసుపత్రుల్లో అగ్ని ప్రమాదాలు జరిగి రోగుల ప్రాణాలు కోల్పోతున్న ఘటనలు ఇటీవల పెరిగాయి. కరోనా విజృంభణతో ఆసుపత్రులు కిటకిటలాడుతున్న సమయంలో.. ఇవి ఆందోళన కలిగిస్తున్నాయి. ఈ క్రమంలో రాష్ట్రాలు, కేంద్ర పాలిత ప్రాంతాలకు కీలక సూచనలు చేసింది కేంద్రం. కరోనా చికిత్స చేసే ఆసుపత్రుల్లో.. అగ్ని ప్రమాదాల నివారణకు, ఇతర అన్ని వసతుల కల్పనకు ముందస్తు ప్రణాళికతో వ్యవహరించాలని కేంద్ర హోం శాఖ సూచించింది.
ఈ మేరకు రాష్ట్రాల ప్రధాన కార్యదర్శులు, కేంద్రాపాలిత ప్రాంతాల పరిపాలన విభాగాలకు లేఖ రాశారు కేంద్ర హోంశాఖ కార్యదర్శి అజయ్ భల్లా. ఆసుపత్రుల్లో అగ్ని ప్రమాదాల నివారణకు గట్టి చర్యలు తీసుకోవాలని కోరారు. ముఖ్యంగా వేసవిని దృష్టిలో పెట్టుకుని చర్యలు చేపట్టాలన్నారు.
హాస్పిటల్స్, వైద్య అవసరాలకు తగిన విధంగా అన్ని ఏర్పాట్లు చేసుకోవాలని.. విద్యుత్‌ సహా.. ఎటువంటి మౌలిక సదుపాయాల్లో అంతరాయాలు లేకుండా చూడాలని ఆదేశించింది కేంద్రం.
ఇదీ చూడండి: తండ్రి చితిలో దూకి కూతురు ఆత్మహత్యాయత్నం
