ఓ వైద్యుడిగా మాస్క్ గురించి ఇతరులకు అవగాహన కల్పిస్తూ.. ధరించేలా చేసే వైద్యుడే నిర్లక్ష్యంగా వ్యవహించాడు. మాస్క్ లేకుండానే సూపర్ మార్కెట్కు వెళ్లాడు. అక్కడి సిబ్బంది, ఇతరులు మాస్క్ పెట్టుకోవాలని సూచిస్తే.. వారితోనే వాగ్వాదానికి దిగాడు. ఈ సంఘటన కర్ణాటకలోని మంగళూరులో జరిగింది. ఈ సంఘటనపై కేసు నమోదు చేశారు పోలీసులు.
కక్కిలయ అనే డాక్టర్.. మే18న ఉదయం 8తర్వాత సూపర్ మార్కెట్కు వెళ్లాడు. అయితే అక్కడి సిబ్బంది ఆయన్ని మాస్క్ ధరించమని అడిగారు. అందుకు ఆయన తిరస్కరించారు. పైగా వారితో గొడవ పడ్డాడు. అంతటితో ఆగకుండా ప్రభుత్వం మాస్క్ పెట్టుకోవాలనే మూర్ఖపు సూచన చేస్తోందని ఆరోపించారు. ఇదంతా గమనించిన మార్కెట్కు సంబంధించిన భాగస్వామి ర్యాన్ రోసారియో.. పోలీసులకు సమాచారమిచ్చారు. అతని ఫిర్యాదు మేరకు కేసు నమోదు చేశారు పోలీసులు.
దీనికి సంబంధించిన వీడియో సామాజిక మాధ్యమాల్లో వైరల్ అయింది. దాంతో ఆ వైద్యునిపై నెటిజన్లు ఆగ్రహం వ్యక్తం చేస్తున్నారు. అతనికి కఠిన శిక్ష వేయాలని కోరుతున్నారు.
ఇదీ చదవండి: 'సీఎం వ్యాఖ్యలను దేశానికి ఆపాదించకూడదు'
