Man Created Garden Using Plastic Waste : ప్లాస్టిక్ వ్యర్థాల్లో అందమైన తోట.. కనువిందు చేస్తున్న 'ఈడెన్ గార్డెన్'

Man Created Garden Using Plastic Waste in Kerala : ప్లాస్టిక్ వ్యర్థాల్లో మొక్కలు పెంచుతూ ఏకంగా ఓ తోటనే ఏర్పాటు చేశారు కేరళ త్రిస్సూర్​కు చెందిన ఓ వ్యక్తి. చూపరులను మంత్రముగ్ధులను చేస్తున్న 'ఈడెన్ ​గార్డెన్​' ప్రత్యేకతలేంటో తెలుసుకుందామా.

Man Created Garden Using Plastic Waste in Kerala : కేరళకు చెందిన ఓ వ్యక్తి.. ప్లాస్టిక్​పై ఒంటరి పోరాటం చేస్తున్నారు. త్రిస్సూర్​లో నివసించే చంద్రన్​ అనే వ్యక్తి.. ప్లాస్టిక్ వ్యర్థాల్లో మొక్కలను పెంచుతూ అందమైన తోటను ఏర్పాటు చేశారు. ప్లాస్టిక్ వల్ల పర్యావరణానికి ఎంతో అనర్థం జరుగుతుందని గ్రహించిన చంద్రన్.. దాని పరిష్కారం దిశగా ఆలోచించారు. ఈ క్రమంలోనే మొక్కలు పెంచడం ప్రారంభించారు.

అయితే, ఈ మొక్కలను ప్లాస్టిక్ వ్యర్థాలతో చేసిన వస్తువుల్లో పెంచారు చంద్రన్. ఇందుకోసం రోడ్ల పక్కన పడి ఉన్న ప్లాస్టిక్ వస్తువులను సేకరించారు. వాటిని అందంగా పేర్చి.. మొక్కలను పెంచారు. గత ఏడేళ్లుగా ఈ తోటను పెంచుతున్నారాయన. దీనికి ఈడెన్ గార్డెన్ అనే పేరు కూడా పెట్టుకున్నారు. ఈ గార్డెన్​లో పెరిగిన మొక్కలను చూస్తుంటే ఆహ్లాదకరమైన అనుభూతి కలుగుతోందని అంటున్నారు చంద్రన్​.

"నాకు ప్రకృతి, పచ్చదనం అంటే చాలా ఇష్టం. గత ఏడేళ్లుగా ఈడెన్ ​గార్డెన్​ను నిర్వహిస్తున్నాను. ఈ గార్డెన్​లో ప్రధానంగా మూడు రకాల మొక్కలను నాటాను. ఈ మొక్కలన్నింటినీ నిరుపయోగమైన ప్లాస్టిక్ వస్తువులలోనే అమర్చాను."
-చంద్రన్, ఈడెన్​ గార్డెన్ నిర్వహకుడు

తోడుగా భార్య..
ప్రస్తుతం చంద్రన్ ఇంటి ప్రాంగణమంతా.. మొక్కలు, పూల అందాలతో కళకళలాడుతోంది. చంద్రన్ ఆశయానికి ఆయన భార్య ఆశా కూడా చేయూతనందిస్తున్నారు. దీంతో ఆ ప్రాంతమంతా నందనవనంలా మారిపోయింది. ప్రస్తుతం అది చూపరులను ఎంతగానో ఆకట్టుకుంటోంది.

"ఈడెన్​ గార్డెన్​ నిర్వహణ నా భర్త చూసుకుంటారు. నా ఇంటి పని పూర్తయ్యాక నేను కూడా తోట పనిలో మమేకమవుతాను. నా భర్తకు పూల మొక్కల కంటే పచ్చని చెట్లంటే చాలా ఇష్టం."
-ఆశా, చంద్రన్​ భార్య

ప్లాస్టిక్ భూతాన్ని తరిమి కొట్టాలనే మంచి ఉద్దేశంతో ముందుకు వెళుతున్న చంద్రన్, ఆశా దంపతులు.. చుట్టుపక్కల వారికే కాకుండా జిల్లా ప్రజలకూ ఆదర్శంగా నిలుస్తున్నారు.

ప్లాస్టిక్ వ్యర్థాలతో డీజిల్
శిలాజ ఇంధనాలతో డీజిల్ తయారు చేయడం మనం చూసుంటాం. కానీ.. ప్లాస్టిక్ వ్యర్థాలతో డీజిల్ ఎలా తయారు చేస్తారో తెలుసా? దీన్ని నిజం చేసి చూపిస్తున్నారు కొందరు యువకులు. ఇంజినీరింగ్​లో రాణించి మంచి ఉద్యోగాలు సంపాదించిన వీరు.. పర్యావరణ పరిరక్షణ కోసం స్వదేశానికి తిరిగి వచ్చి ప్లాస్టిక్ వ్యర్థాలతో డీజిల్ తయారు చేసే పరిశ్రమను స్థాపించారు. వారి కథేంటో తెలుసుకోవాలంటే ఈ లింక్​పై క్లిక్ చేసేయండి.