నందిగ్రామ్లో భాజపా నేత సువేందు అధికారి ఎన్నికను సవాలు చేస్తూ బంగాల్ సీఎం మమతా బెనర్జీ నమోదు చేసిన కేసు విచారణ నుంచి జస్టిస్ కౌషిక్ చందా తప్పుకున్నారు. న్యాయ వ్యవస్థపై దురుద్దేశాన్ని ఆపాదించినందుకు మమతకు రూ.5లక్షల జరిమానాను విధించారు.
ఇదీ జరిగింది..
నందిగ్రామ్లో భాజపా నేత సువేందు అధికారి ఎన్నికను సవాలు చేస్తూ.. బంగాల్ ముఖ్యమంత్రి మమతా బెనర్జీ దాఖలు చేసిన వ్యాజ్యంపై జస్టిస్ కౌషిక్ చందా నేతృత్వంలోని ఏకసభ్య ధర్మాసనం విచారణ చేపట్టింది. జస్టిస్ చందాకు భాజపాతో సంబంధాలు ఉన్నాయని మమత ఆరోపించారు. నందిగ్రామ్ పిటిషన్ను ఇతర బెంచ్కు బదిలీ చేయాలని కోరారు. విచారణ నుంచి జస్టిస్ కౌషిక్ చందాను తప్పించాలని జూన్ 18న హైకోర్టు ప్రధాన న్యాయమూర్తికి మమత తరపు న్యాయవాది లేఖ రాశారు.
జస్టిస్ కౌషిక్ చందాను కేసు విచారణ నుంచి తప్పించాలని కోరుతూ జూన్ 24న పిటిషన్ దాఖలు చేశారు మమత. నందిగ్రామ్ ఫలితాలను సవాల్ చేస్తూ ముఖ్యమంత్రి మమతా బెనర్జీ దాఖలు చేసిన పిటిషన్తో సహా న్యాయమూర్తి తప్పుకోవాలని కోరుతూ చేసిన దరఖాస్తులపై విచారణ చేపట్టింది జస్టిస్ కౌషిక్ చందా నేతృత్వంలోని ఏకసభ్య ధర్మాసనం. న్యాయ వ్యవస్థపై దురుద్దేశాన్ని ఆపాదించినందుకు ఈ మేరకు రూ.5లక్షల జరిమానా విధిస్తూ.. విచారణ నుంచి తప్పుకుంటున్నట్లు ప్రకటించారు. ఈ నగదును కొవిడ్-19తో ప్రభావితమైన న్యాయవాదుల కుటుంబాలకు అందించాలని స్పష్టం చేశారు.
ఇవీ చదవండి:'అలాంటి వారికి ఈ సమాజంలో స్థానం లేదు'
