'కొవిడ్​ టీకా​ తీసుకుంటేనే జీతాలు.. లేదంటే...'

కరోనా టీకాలు తీసుకోని ఉద్యోగులపై కఠిన చర్యలకు ఉపక్రమించింది మహారాష్ట్రలోని ఠాణె మున్సిపల్​ కార్పొరేషన్​(టీఎంసీ). టీకా వేయించుకోని సిబ్బందికి వేతనాలు చెల్లించేది లేదని ప్రకటించింది.

దేశంలో కొవిడ్​ వ్యాక్సినేషన్​ శరవేగంగా జరుగుతోంది. ఇటీవల టీకా డోసుల పంపిణీలో 100 కోట్ల మైలురాయిని అందుకుంది. అయినా.. కొందరు వ్యాక్సిన్​ తీసుకోవడానికి ముందుకు రావడం లేదు. ఆ జాబితాలో ప్రభుత్వ ఉద్యోగులు కూడా ఉన్నారు. దీంతో కఠిన నిర్ణయాలు తీసుకుంటున్నాయి సంబంధిత సంస్థలు. కనీసం ఒక్క డోసు కూడా తీసుకోని సిబ్బందికి జీతాలు చెల్లించబోమని ప్రకటించింది మహారాష్ట్రలోని ఠాణె మున్సిపల్​ కార్పొరేషన్​(టీఎంసీ). ఠాణె మేయర్​ నరేశ్ మస్కే.. సీనియర్​ అధికారులతో సమావేశమై ఈ మేరకు నిర్ణయం తీసుకున్నారు.

నిర్దేశిత సమయంలో రెండు డోసు అందుకోనివారికి కూడా వేతనాలు చెల్లించేది లేదని తాజా ప్రకటనలో పేర్కొంది టీఎంసీ. సిబ్బంది తప్పనిసరిగా టీకాలు తీసుకుని.. వ్యాక్సినేషన్​​ ధ్రువపత్రాలను సంబంధిత కార్యాలయాలకు సమర్పించాలని స్పష్టం చేసింది. ఈ నెలాఖరుకు నగరంలో 100 శాతం వ్యాక్సినేషన్​ లక్ష్యంలో భాగంగా ఈ కఠిన చర్యలకు ఉపక్రమించినట్లు మస్కే తెలిపారు.

లక్ష్యాన్ని సాధించే దిశగా నగర పౌరులు సహకారం అందించాలని కోరారు మేయర్ నరేశ్​​. తప్పని సరిగా ప్రతి ఒక్కరు టీకా తీసుకోవాలని సూచించారు.

ఇదీ చూడండి: వర్ధంతి కార్యక్రమంలో కేంద్ర మంత్రి డ్యాన్స్​.. వీడియో వైరల్​