Lover fair in Uttar Pradesh: మకర సంక్రాంతి సందర్భంగా ఉత్తర్ప్రదేశ్లోని బాందా నగరంలో నిర్వహించిన 'ప్రేమికుల జాతర' ప్రత్యేక ఆకర్షణగా నిలిచింది. రెండు రోజుల పాటు జరిగిన ఈ ఉత్సవాలకు సుదూర ప్రాంతాల నుంచి వందలాది మంది తరలివచ్చారు. ఇక్కడికి ఎక్కువగా ప్రేమ జంటలు వస్తుంటాయి. ఈ ప్రాంతంలో నిర్మించిన నట్బాలీ బాబా ఆలయంలో ప్రత్యేక పూజలు నిర్వహిస్తారు ప్రేమికులు. తమ కోరికను బాబాతో చెప్పుకుంటే.. తప్పకుండా నెరవేరుతుందనేది వారి నమ్మకం. వందల ఏళ్ల నుంచి మకర సంక్రాంతి రోజున ఈ ప్రేమికుల జాతరను నిర్వహిస్తున్నారు. ఈ ఏడాది ఏర్పాటు చేసిన సాంస్కృతిక కార్యక్రమాలు ఆకట్టుకున్నాయి.
బాందా నగరంలోని కేన్ నది ఒడ్డున ఉన్న భురాగఢ్ కోటలో రెండు రోజుల పాటు ఈ ప్రేమికుల జాతర వైభవంగా జరుగుతుంది. కోట ప్రాకారాల కింద నిర్మించిన నట్బాలీ బాబా ఆలయం ప్రజల విశ్వాసానికి ప్రతీకగా ఉంది.
ఇదీ కథ..
600 ఏళ్ల క్రితం మహోబా జిల్లాలోని సుగిరా ప్రాంతానికి చెందిన నోనే అర్జున్ సింగ్ అనే రాజు.. భురాగఢ్ ప్రాంతాన్ని పాలించేవారు. మధ్యప్రదేశ్, సారాబాయి ప్రాంతంలోని నట్ సమాజానికి చెందిన బీరన్ అనే 21 ఏళ్ల యువకుడు ఆ కోటలో సేవకుడిగా ఉండేవాడు. మంత్రతంత్రాలతో పాటు అన్నీ రంగాల్లో అపార నైపుణ్యం అతని సొంతం. ఈ క్రమంలోనే రాజు కూతురు బీరన్ను ప్రేమించింది. బీరన్ను పెళ్లి చేసుకోవాలని నిశ్చయించుకుని తండ్రికి తెలపగా.. తన కుమార్తెకు ఓ షరతు విధించారు రాజు అర్జున్ సింగ్. కేన్ నదికి అవతలివైపు ఉన్న బాంబేశ్వర్ పర్వతంపైన కోట నుంచి భురాగఢ్ కోట వరకు నదిపైన తాడు సాయంతో బీరన్ రాగలిగితే.. అతనికి ఇచ్చి వివాహం చేస్తానని చెప్పారు. అలాగే.. తన అర్ధరాజ్యాన్ని ఇస్తానని హామీ ఇచ్చారు.
ఈ షరతును అంగీకరించిన బీరన్.. నదికి అవతలి వైపు ఉన్న బాంబేశ్వర్ కోట నుంచి మరోవైపు ఉన్న కోటలోకి తాడు ద్వారా వచ్చే ప్రయత్నం చేశాడు. ఈ పందెం గెలిచే అవకాశం ఉందని తెలుసుకున్న రాజు.. తాడుని తెగ్గొట్టేస్తారు. దీంతో తాడు తెగిపోయి బీరన్ కోట ప్రకారాలపై పడి మరణిస్తాడు. ఈ విషయం తెలుసుకున్న రాజు కుమార్తె.. కోటపై నుంచి దూకి ఆత్మహత్య చేసుకుంటుంది.
వీరి ప్రేమకు చిహ్నంగా ఆ ప్రాంతంలో వారి సమాధులను నిర్మించారు. అనంతరం వాటి పైన గుడి కట్టారు. నాటి నుంచి మకర సంక్రాంతి రోజున స్థానికులతో పాటు ఇతర ప్రాంతాలకు చెందినవారు ఇక్కడికి చేరుకుని ప్రత్యేక పూజలు నిర్వహిస్తున్నారు.
ఇదీ చూడండి: జల్లికట్టు జోరు- బసవన్నలతో యువకుల పోరు
