Love proposal with hoarding: అందరిలా కాకుండా వినూత్నంగా ఆలోచించి తాను ప్రేమించిన అమ్మాయి మనసు గెలుచుకున్నాడు ఓ యువకుడు. తన ప్రేమను తెలిపేందుకు ఏకంగా భారీ హోర్డింగ్నే ఏర్పాటు చేశాడు. 'మ్యారీ మీ ఉత్కర్ష' అనే భారీ హోర్డింగ్ ముందే యువతికి ప్రపోజ్ చేశాడు. ఈ సంఘటన మహారాష్ట్రలోని కొల్హాపుర్లో జరిగింది.
కొల్హాపుర్కు చెందిన సౌరభ్ కస్బేకర్ అనే యువకుడు సంగ్లీ జిల్లా, బుధ్గావూన్లోని వసంత్రావ్ దాదా పాటీల్ ఇన్స్టిట్యూట్ ఆఫ్ టెక్నాలజీలో సివిల్ ఇంజినీరింగ్ చదువుతున్నాడు. సింగ్లీకి చెందిన ఉత్కర్ష అనే యువతి సైతం సివిల్ ఇంజినీరింగ్ చేస్తోంది. 2017 నుంచి ఇరువురు ఒకే కోర్సు చేస్తున్నారు. అయినప్పటికీ గతేడాది వరకు ఇరువురికి అంతగా పరిచయం లేదు. ఇంజినీరింగ్ పూర్తయిన తర్వాత.. సౌరభ్కు వివాహం చేయాలని నిశ్చయించారు కుటుంబ సభ్యులు. ఎవరైనా అమ్మాయిని ప్రేమిస్తే చెప్పాలని, పెళ్లి చేస్తామని హామీ ఇచ్చారు. దీంతో ఉత్కర్ష అనే యువతి పేరును బయటపెట్టాడు. ఈ క్రమంలో వారి ఇంట్లో మాట్లాడి పెళ్లికి ఒప్పించాలని నిర్ణయించారు. కానీ, సౌరభ్ దానికి నిరాకరించాడు. ముందుగా వినూత్న రీతిలో ప్రపోజ్ చేయాలనుకున్నాడు.
సంగ్లీ-కొల్హాపుర్ జాతీయ రహదారి పక్కన 'మ్యారీ మీ ఉత్కర్ష' అంటూ భారీ హోర్డింగ్ ఏర్పాటు చేశాడు సౌరభ్. ఆ హోర్డింగ్ ముందే ప్రపోజ్ చేశాడు. సౌరభ్ ఇచ్చిన సర్ప్రైజ్తో మైమరచిపోయిన ఉత్కర్ష.. వెంటనే ఓకే చెప్పేసింది. సౌరభ్తో పెళ్లికి సిద్ధమని తేల్చేసింది. ఈ క్రమంలో ఇరువురు హోర్డింగ్ ముందు ఫొటోలకు ఫోజులిచ్చారు. వారి లవ్స్టోరీ గురించి జిల్లావ్యాప్తంగా చర్చ మొదలైంది. మే 27న వారి వివాహానికి ముహూర్తం ఖరారు చేశారు. ప్రస్తుతం వారు ఎంటెక్ చేస్తున్నట్లు తెలిపారు.
ఇదీ చూడండి: సినిమా పోస్టర్లతో కోటు.. మంత్రి డ్రెస్సింగ్ స్టైల్ అదుర్స్!
