నూతన సాగు చట్టాలపై చర్చించాలన్న విపక్షాల డిమాండ్తో వారం రోజులుగా వాయిదా పడుతూ వచ్చిన లోక్సభ.. రక్షణ మంత్రి రాజ్నాథ్ సింగ్ వినతితో సోమవారం సాధారణ పనితీరును కనబర్చింది. రాష్ట్రపతి ప్రసంగానికి ధన్యవాదాలు తెలిపే తీర్మానాన్ని ప్రవేశ పెట్టడం సంప్రదాయం అని.. దానిని కొనసాగించే బాధ్యత ప్రతి సభ్యుడిపై ఉందని రాజ్నాథ్ సింగ్ అంతకుముందు విజ్ఞప్తి చేశారు.
10 నిమిషాల్లోనే వాయిదా..
సోమవారం కూడా లోక్సభ సమావేశమైన పది నిమిషాలకే వాయిదా పడింది. సాయంత్రం 5 గంటలకు సభ తిరిగి సమావేశమైన తర్వాత.. రాజ్నాథ్ సింగ్ మాట్లాడారు. రాష్ట్రపతి ప్రసంగానికి ధన్యవాదాలు తెలిపే తీర్మానాన్ని రాజ్యసభ ఇప్పటికే ఆమోదించిందని గుర్తుచేశారు. లోక్సభలో ఆ సంప్రదాయాన్ని విచ్ఛిన్నం చేయవద్దని కోరారు. ఈ తీర్మాన సమయంలో సాగు చట్టాల గురించి సభ్యులు మాట్లాడవచ్చని తెలిపారు.
ప్రభుత్వం ఆ హామీ ఇవ్వాలి..
ధన్యవాద తీర్మాన సంప్రదాయం 1921 నుంచి కొనసాగుతోందని లోక్సభలో కాంగ్రెస్ పక్ష నేత అధీర్ రంజన్ చౌదరి అన్నారు. అయితే.. దిల్లీలోకి ప్రవేశించకుండా రైతులను అడ్డుకుంటున్నారని, రోడ్లపై మేకులు కొడుతున్నారని ధ్వజమెత్తారు. ఈ నేపథ్యంలో సాగు చట్టాలపై చర్చించాలనేదే తమ డిమాండ్ అని పేర్కొన్నారు. ధన్యవాద తీర్మానం అనంతరం లేదా బడ్జెట్పై చర్చ తర్వాతనైనా సాగు చట్టాలపై చర్చించేందుకు ప్రభుత్వం హామీ ఇవ్వాలని కోరారు.
ఆహ్వానం.. అంగీకారం
సభా కార్యకలాపాలకు అడ్డుపడవద్దని, నినాదాలు చేయవద్దని సభ్యులకు లోక్ సభ స్పీకర్ ఓం బిర్లా విజ్ఞప్తి చేశారు. సమావేశాల్లో నెలకొన్న అనిశ్చితిని తొలగించే దిశగా.. అంతకుముందు ఆయన వివిధ పార్టీ నేతలను భేటీకి ఆహ్వానించారు. ఈ సమావేశంలో, రాష్ట్రపతి ప్రసంగంపై చర్చను ప్రారంభించాలని రాజ్ నాథ్ సింగ్ విజ్ఞప్తి చేశారు. దీంతో సాధారణ పనితీరును తిరిగి ప్రారంభించడానికి సభ్యులు అంగీకరించారు.
ఇదీ చదవండి:చర్చలకు సిద్ధం.. తేదీ చెప్పండి: రైతు నేతలు
