Chennai Lawyer Fine: కరోనా సమయంలో కోర్టులు ప్రత్యక్ష విచారణను తాత్కాలికంగా నిలిపివేసి ఆన్లైన్ వేదికగా కేసుల వాదనలు విన్నాయి. చెన్నై హైకోర్టు ఓ కేసును వర్చువల్గా విచారించినప్పుడు సంతాన క్రిష్ణన్ అనే న్యాయవాది తనతో పాటు ఉన్న ఓ మహిళతో అసభ్యంగా ప్రవర్తించాడు. తన ముందు కెమెరా ఆన్ చేసి ఉందనే విషయాన్ని కూడా మర్చిపోయి రెచ్చిపోయాడు. ఈ వీడియోను ఈ కేసులో హాజరైన మరో వ్యక్తి మొబైల్లో రికార్డు చేశాడు. దాన్ని సోషల్ మీడియాలో షేర్ చేయగా తెగ వైరల్ అయింది. దీంతో చెన్నై హైకోర్టు జడ్జిలు, న్యాయవాదులు షాక్కు గురయ్యారు. ఈ ఘటనను సుమోటోగా స్వీకరించిన చెన్నై హైకోర్టు సీబీసీఐడీతో విచారణ జరపాలని ఆదేశించింది.
కోర్టు ఆదేశాలతో సీబీసీఐడీ అధికారులు కేసు నమోదు చేసి లాయర్ సంతాన క్రిష్ణన్ను అరెస్టు చేశారు. వాదనలు విన్న జస్టిస్ పీఎన్ ప్రకాశ్ నేతృత్వంలోని ధర్మాసనం.. లాయర్ను రూ.4లక్షలు జరిమానా కట్టాలని ఆదేశించింది. ఆ మొత్తాన్ని బాధితురాలికి అందజేయాలని చెప్పింది. దీంతో ఏప్రిల్ 6న లాయర్ సంతాన క్రిష్ణన్ రూ.4లక్షలను బాధితురాలికి పరిహారంగా ఇచ్చారు. అనంతరం జడ్జి కేసును వాయిదా వేశారు. తదుపరి విచారణపై ఎలాంటి తేదీలను ప్రస్తావించలేదు.
ఇదీ చదవండి: యోగికి వార్నింగ్ ఇచ్చిన ఎమ్మెల్యేకు 'బుల్డోజర్ దెబ్బ'- పెట్రోల్ బంక్ ఫసక్!
