ప్రస్తుతం ప్రపంచం వేగంగా మారిపోతోంది. మహిళలు తమకు ఉన్న హద్దులు చెరిపేస్తూ ఏ పనినైనా తాము చేయగలమని నిరూపిస్తూ ఔరా అనిపిస్తున్నారు. అలాంటి కోవకే చెందుతుంది కేరళ కొట్టాయంకు చెందిన 18 ఏళ్ల యువతి. బులెట్ బైక్లను ప్రొఫెషనల్ మెకానిక్లా రిపేర్ చేస్తూ.. అందరి దృష్టిని ఆకర్షిస్తోంది. ఆమెనే దియా జోసెఫ్.
కొట్టాయంకు చెందిన జోసెఫ్ కూతురే దియా. జోసెఫ్ నగరంలోని రైల్వే స్టేషన్కు సమీపంలో ద్విచక్రవాహన మెకానిక్ వర్క్ షాప్ నడిపిస్తున్నారు. తండ్రి చేసే పనిని రోజూ గమనిస్తూ.. బులెట్ బైక్లను ఎలా బాగు చేయాలో తెలుసుకుంది. 10వ తరగతిలో ఉన్నప్పుడు వేసవి సెలవుల్లో తండ్రికి సాయం చేస్తూ.. రిపేరింగ్లో పూర్తి పట్టు సాధించింది. ప్రస్తుతం.. బైకులకు ఆయిల్ మార్చటం, ఇతర సాధారణ రిపేర్లు వంటివి చేస్తోంది. ఈ క్రమంలోనే బులెట్ నడపటమూ నేర్చేసుకుంది దియా.
మెకానిక్ వర్క్షాప్కు వచ్చే వినియోగదారులు దియా పనిని చూసి మెచ్చుకుంటున్నారు. మెకానిక్గానే కాకుండా చదువులోనూ రాణిస్తోంది. ఇంటర్లో 98 శాతం మార్కులతో ఔరా అనిపించింది. ప్రస్తుతం దియా.. ఇంజినీరింగ్ ప్రవేశ పరీక్షకు సన్నద్ధమవుతోంది. అయినప్పటికీ.. తనకు సమయం దొరికినప్పుడల్లా బులెట్ బైక్లు రిపేర్ చేస్తూ.. రోజుకు రూ.2000 వరకు సంపాదిస్తోంది.
తాను ఆటోమొబైల్ ఇంజినీరింగ్ చేయాలనుకుంటున్నట్లు తెలిపింది దియా. అయితే.. బులెట్ మెకానిక్ పనిని కొనసాగిస్తానని చెబుతోంది. మరోవైపు.. తనకు డ్రైవింగ్ లైసెన్స్ రాగానే తండర్బోల్ట్ బులెట్ బైక్పై లాంగ్ డ్రైవ్కు వెళ్లాలనుకుంటున్నాని తెలిపింది దియా. ఆ బైక్ను తన తండ్రి కానుకగా ఇచ్చినట్లు చెప్పింది.
ఇదీ చూడండి: సొంతిల్లు, సొంత వాహనం లేని ముఖ్యమంత్రి
