పనిచేస్తేగాని ఇళ్లు గడవదు ఆ చిన్నారులకు. అయినా.. నిరాశ, నిస్పృహలకు లోనుకాకుండా జీవనపోరాటాన్ని సాగిస్తున్నారు. వారి నానమ్మతో కలిసి చేపల అమ్మకం చేపడుతున్నారు.
చేపల అమ్మకం..
కేరళలోని తిరువనంతపురానికి చెందినవారు అభిజిత్(11), అమృత(12). వారి నానమ్మ సుధ దగ్గరే ఉంటారు. చిన్న టీ స్టాల్ నడుపుతూ వారి బాధ్యతను చూసుకునేది సుధ. కరోనా కారణంగా టీ స్టాల్ మూతపడింది. దీంతో వారు చేపల విక్రయం చేస్తున్నారు. ఉదయాన్నే లేవగానే దగ్గరలోని విళింజమ్ ప్రాంతం నుంచి చేపలు కొనుగోలు చేస్తారు. అనంతరం సైకిల్పై చేపల పెట్టెను పెట్టుకుని పంచకరి జంక్షన్ వద్దకు చేరుకుంటారు. అక్కడ సుధ చేపలను విక్రయిస్తుంది. ఆమెకు చేదోడువాదోడుగా ఉంటాడు అభిజిత్. తానే స్వయంగా సైకిల్పై చేపల పెట్టెను పెట్టుకుని వీధుల వెంట తిరుగుతూ అమ్ముతాడు. ఈ విధంగా వచ్చిన డబ్బుతో జీవనాన్ని సాగిస్తున్నారు.
తానే అమ్మానాన్నై..
అభిజిత్, అమృత పసిపిల్లలుగా ఉన్నప్పుడే తల్లితండ్రులు వారిని ఓ అంగన్వాడీ కేంద్రంలో వదిలివెళ్లారు. బంధువులెవరూ చేరదీయలేదు. విషయం తెలుసుకున్న నానమ్మ సుధ.. వారికి అన్నీ తానే అయి చేరదీసింది. తనే వారి బాగోగులు చూసుకుంటోంది. దిక్కుతోచని స్థితిలో పిల్లలకు అన్నం పెట్టడానికి ఒకానొక సందర్భంలో యాచకురాలిగానూ మారింది.
నగరంలోని పట్టోమ్లో ఉన్న సెయింట్ మేరీ పాఠశాలలో ఏడవ తరగతి చదువుతున్నాడు అభిజిత్. పోలీస్ కావడం తన కల అంటున్నాడు. నానమ్మను గౌరవంగా చూసుకుంటానని చెబుతున్నాడు. సెయింట్ ఫిలోమినాస్ కాన్వెంట్లో ఎనిమిదవ తరగతి చదువుతోంది అమృత. కలెక్టర్ అవుతానని అంటోంది. తమ లాగే ఇబ్బందులు పడేవారికి సహాయం చేస్తానని చెబుతోంది. పిల్లలిద్దరితో కలిసి గత 15 ఏళ్లుగా అద్దె భవనంలో నివసిస్తోంది సుధ. క్యాన్సర్తో బాధపడుతున్నా.. పిల్లల బాగుకోసం ఆరాటపడుతోంది. ఉండటానికి ఒక ఇళ్లు కట్టించి, పిల్లలకు ఉన్నత చదువులు అందించాలని కోరుకుంటోంది.
