టోల్​ ఛార్జీ కట్టకుండా స్కెచ్- హైవే పక్కనే మరో రోడ్

జాతీయ రహదారి వెంటే ఉంటుంది ఆ గ్రామం. పక్కనే టోల్​గేట్​. ఆ ఊరి వాహనాలు రాకపోకలు సాగించాలంటే ప్రతిసారీ టోల్​ ఛార్జీ చెల్లించాల్సిందే. ఈ భారం నుంచి తప్పించుకునేందుకు అక్కడి ప్రజలు చేసిన పని సర్వత్రా చర్చనీయాంశమైంది.

టోల్​ ఛార్జీల బాదుడు భరించలేక ఓ ఊరి ప్రజలు సాహసమే చేశారు. జాతీయ రహదారికి సమాంతరంగా మరో రోడ్డు వేసేశారు. ఈ ఘటన కర్ణాటకలో జరిగింది.

ఇదీ జరిగింది..

ఉడుపి జిల్లా హేజ్​మాడి గ్రామానికి చెందిన వాహనాలకు టోల్ ఛార్జీ నుంచి మినహాయింపు ఇవ్వాలని అక్కడి ప్రజలు సంబంధిత అధికారులను కోరారు. అయితే వారి నుంచి ఎలాంటి స్పందన రాలేదు. రహదారి కాంట్రాక్టర్​ అయిన నవయుగ ఉడుపి టోల్​వే ప్రైవేట్​ లిమిటెడ్​(ఎన్​యూటీపీఎల్) సదరు వాహనాలకు ఉచిత ప్రవేశాన్ని నిరాకరించింది. వెంటనే సర్పంచ్ నేతృత్వంలో హేజ్​మాడి గ్రామస్థులు ఓ తీర్మానం చేశారు. టోల్​గేట్ ఉన్న ప్రాంతంలో జాతీయ రహదారికి సమాంతరంగా రోడ్డు వేయాలని నిర్ణయించారు. అనుకున్నదే తడవుగా పనులు ప్రారంభించారు. మార్చి 30 నాటికి రోడ్డు నిర్మాణం పూర్తి చేశారు. ఆ ఊరి వాహనాలన్నీ కొత్త రోడ్డు ద్వారా ప్రయాణాలు సాగించడం ప్రారంభించాయి.

దీనితో సంబంధిత కాంట్రాక్టర్లు దిగొచ్చారు. హేజ్​మాడి, కోడీ గ్రామాలకు చెందిన వాహనాలకు టోల్​ఛార్జీ నుంచి మినహాయింపు ఇస్తున్నట్లు ప్రకటించారు. ఆయా ఊళ్లకు చెందిన వాహనాల వివరాలను నమోదు చేయించుకోవాలని సూచించారు.

ఇదీ చదవండి: అజేయుడు ఊమెన్‌ చాందీ.. 12వ సారి బరిలోకి