Karnataka Election Results 2023 : కర్ణాటక ఎన్నికల ఫలితాలు వివాదాస్పద మైనింగ్ వ్యాపారి గాలి జనార్దనరెడ్డి కుటుంబానికి తీవ్ర నిరాశను మిగిల్చాయి. జనార్దనరెడ్డి మినహా పోటీలో ఉన్న కుటుంబసభ్యులందరూ ఓటమి పాలయ్యారు. ఆయన సోదరులు సోమశేఖరరెడ్డి, కరుణాకర్రెడ్డి బీజేపీ తరఫున పోటీ చేయగా.. భార్య లక్ష్మీ అరుణ, జనార్దనరెడ్డి సొంత పార్టీ కల్యాణ రాజ్యప్రగతి పక్ష అభ్యర్థులుగా బరిలో నిలిచారు. వారి కంచుకోటగా భావించే బళ్లారిలో భార్య, సోదరుడు సోమశేఖరరెడ్డిని కాదని కాంగ్రెస్ అభ్యర్థికి పట్టం కట్టారు ఓటర్లు. హరపనహళ్లి నియోజకవర్గం నుంచి బీజేపీ తరఫున పోటీ చేసిన కరుణాకర్రెడ్డి.. ప్రత్యర్థి లతా మల్లిఖార్జున్ చేతిలో ఓటమిపాలయ్యారు. మరోవైపు ఆయన సన్నిహితుడు మాజీ మంత్రి శ్రీరాములు సైతం కాంగ్రెస్ అభ్యర్థి నాగేంద్ర చేతిలో ఓడిపోయారు.
Kalyana Rajya Pragati Party : ఎన్నో అంచనాల మధ్య పార్టీ పెట్టిన వివాదాస్పద మైనింగ్ వ్యాపారి గాలి జనార్దనరెడ్డికి ఎదురుదెబ్బ తగిలింది. కల్యాణ రాజ్యప్రగతి పక్ష పేరుతో పార్టీని స్థాపించి బరిలోకి దిగగా.. ఆయన ఒక్కరే గెలిచారు. గంగావతి నియోజకవర్గం నుంచి పోటీ చేసిన ఆయన కాంగ్రెస్ అభ్యర్థి ఇక్భాల్ అన్సారీపై గెలుపొందారు. బళ్లారి సిటీ నియోజకవర్గంలో తన సోదరుడు, బీజేపీ నేత సోమశేఖరెడ్డిపై భార్య లక్ష్మీని కేఆర్పీపీ అభ్యర్థిగా పోటీకి దింపగా ఇద్దరూ పరాజయం పాలయ్యారు. గాలి కుటుంబానికి కంచుకోటగా ఉన్న బళ్లారిలో కాంగ్రెస్ అభ్యర్థి నారా భరత్ రెడ్డి ఘనవిజయం సాధించారు.
బళ్లారి సిటీ నియోజకవర్గం నుంచి వదిన, మరిది పోటీలో ఉండగా.. కాంగ్రెస్ నుంచి నారా భరత్ రెడ్డి బరిలోకి దిగారు. కాంగ్రెస్ నుంచి టికెట్ ఆశించి భంగపడ్డ మాజీ ఎమ్మెల్యే అనిల్ లాడ్ జేడీఎస్ నుంచి పోటీ చేశారు. అయితే, గాలి కుటుంబం ప్రాబల్యం అధికంగా ఉన్న ప్రాంతం కావడం వల్ల వదిన, మరిది మధ్యే తీవ్ర పోటీ ఉంటుందని అందరూ భావించారు. కానీ అనూహ్యంగా కాంగ్రెస్ అభ్యర్థి నారా భరత్ రెడ్డి రేసులోకి వచ్చి ఘన విజయం సాధించారు.
బళ్లారి ఎప్పుడూ ప్రత్యేకమే
Ballari Elections 2023 : ఉత్తరాది పార్టీగా పేరున్న భారతీయ జనతా పార్టీ దక్షిణాదిలో తొలిసారిగా గెలిచింది ఇక్కడే. కాంగ్రెస్ మాజీ అధ్యక్షురాలు సోనియా గాంధీ సహా బీజేపీ సీనియర్ నేత దివంగత సుష్మ స్వరాజ్ లాంటి నాయకులు ఇక్కడి నుంచి పోటీ చేసి దేశ ప్రజల దృష్టిని ఆకర్షించారు. 2004 అసెంబ్లీ ఎన్నికల్లో గాలి జనార్దనరెడ్డి సన్నిహితుడు శ్రీరాములు.. కాంగ్రెస్ అభ్యర్థి దివాకర్బాబుపై 6,711 ఓట్లతో గెలిచారు. 2008లో గాలి జనార్దనరెడ్డి సోదరుడు సోమశేఖర రెడ్డి తొలిసారి ఎమ్మెల్యేగా గెలిచారు. కాంగ్రెస్ అభ్యర్థి అనిల్ లాడ్పై 1,022 ఓట్ల ఆధిక్యంతో విజయం సాధించారు. ఆ తర్వాత జరిగిన 2013 అసెంబ్లీ ఎన్నికలకు సోమశేఖర రెడ్డి దూరంగా ఉన్నారు. ఫలితంగా ఈ ఎన్నికల్లో కాంగ్రెస్ అభ్యర్థి అనిల్ లాడ్ గెలిచారు. 2018 ఎన్నికల బరిలో మరోసారి నిలిచిన సోమశేఖర రెడ్డి రెండోసారి ఎమ్మెల్యేగా గెలుపొందారు.
గాలి సన్నిహితుడు శ్రీరాములు ఓటమి
గాలి జనార్దనరెడ్డి సన్నిహితుడు, రాష్ట్ర రవాణాశాఖ మంత్రి శ్రీరాములు ఓటమిపాలయ్యారు. బళ్లారి(ఎస్టీ రిజర్వుడు) నియోజకవర్గంలో ఆయన ప్రత్యర్థి కాంగ్రెస్ అభ్యర్థి నాగేంద్ర చేతిలో ఓడిపోయారు.
ఇవీ చదవండి : కాంగ్రెస్ దూకుడు.. బీజేపీకి బిగ్ షాక్.. హంగ్ అంచనాలు తారుమారు!
ఓటమి ఎరుగని పెద్దాయన.. 92ఏళ్ల ఏజ్లో రికార్డ్.. దటీజ్ శివశంకరప్ప!
