ఒక కిలోకు ఎన్ని కొర్రలు ఉంటాయో చెప్పటం సామాన్యులకు దాదాపు అసాధ్యం. కానీ ఆ పనిని సుసాధ్యం చేసి చూపాడు కర్ణాటకకు చెందిన అభిషేక్. 87 గంటల 35 నిమిషాల్లో కిలో కొర్రలను లెక్కించి రికార్డు నెలకొల్పాడు. మొత్తం 4లక్షల 4వేల 882 కొర్రలను లెక్కించి ప్రఖ్యాత ఇండియాస్ వరల్డ్ రికార్డ్స్లో చోటు సంపాదించాడు.
ఈ ఘనత సాధించేందుకు మొత్తం 87 గంటల 35 నిమిషాలు కష్టపడ్డాడు అభిషేక్. ప్రతి 500 కొర్రలను ఒక ప్యాకెట్గా చేశాడు. ఇండియా వరల్డ్ రికార్డ్స్ యాజమాన్యం సమక్షంలోనే ఈ పని పూర్తి చేశాడు.
లాక్డౌన్లో..
కర్ణాటక శివమొగ్గ.. అశోక్ రోడ్కు చెందిన అభిషేక్.. ప్రస్తుతం బీబీఏ చదువుతున్నాడు. లాక్డౌన్ సమయాన్ని సద్వినియోగం చేసుకుని.. చేతికి సరిగా దొరకని కొర్రలను లెక్కించటం సాధన చేశాడు.
అభిషేక్ సాధించిన విజయంపై అతడి తల్లిదండ్రులు, బంధువులు సంతోషం వ్యక్తం చేశారు.
గతంలోనూ..
గతంలోనూ కర్ణాటకకు చెందిన సచిన్ అనే యువకుడు కిలో రాగి గింజలను లెక్కించి.. ఇండియా వరల్డ్ రికార్డ్స్లో చోటు సాధించాడు. 146 గంటల 30 నిమిషాల్లో మొత్తం కిలోకు 3,76,083 రాగి విత్తనాలు ఉన్నట్లు గుర్తించాడు సచిన్. పూర్తి వివరాల కోసం ఇక్కడ క్లిక్ చేయండి కిలో రాగి గింజలు లెక్కపెట్టి.. రికార్డు కొల్లగొట్టి...
ఇదీ చదవండి : మాజీ భార్యే సవతి తల్లి అయిందని తెలిస్తే...
