Kapu Movement Leader Mudragada Padmanabham: కాపు ఉద్యమ నేత, మాజీ మంత్రి ముద్రగడ పద్మనాభం జనసేన తీర్థం పుచ్చుకోనున్నట్లు తెలుస్తోంది. ఇప్పటివరకు వైఎస్సార్సీపీలో చేరుతారన్న ప్రచారం జోరుగా సాగింది. అయితే తెలుగుదేశం, జనసేన నేతలతో సమావేశమైన ముద్రగడ పద్మనాభం వైఎస్సార్సీపీ నేతలు వస్తామంటే మాత్రం విముఖత చూపినట్లు సమాచారం. దీంతో ముద్రగడ జనసేనలో చేరనున్నారనే ప్రచారం బలంగా సాగుతోంది.
ముద్రగడ పద్మనాభం వైఎస్సార్సీపీలో చేరుతారన్న ప్రచారం ఇన్నాళ్లు జోరుగా సాగింది. అయితే కాకినాడ జిల్లా కిర్లంపూడిలో చోటుచేసుకున్న పరిణామాలు ఆ ప్రచారాన్ని పటాపంచలు చేశాయి. బుధవారం రాత్రి తాడేపల్లిగూడెం నియోజకవర్గ జనసేన ఇంఛార్జి బొలిశెట్టి శ్రీనివాస్, అమలాపురానికి చెందిన కాపు ఐకాస నాయకులు ముద్రగడ నివాసానికి వెళ్లి రెండు గంటలకు పైగా భేటీ అయ్యారు.
మరోవైపు గురువారం ఉదయం తెలుగుదేశం రాష్ట్ర ఉపాధ్యక్షుడు జగ్గంపేట మాజీ ఎమ్మెల్యే జ్యోతుల నెహ్రూ, మరికొంత మంది నేతలు ముద్రగడతో 40 నిమిషాల పాటు సమావేశమయ్యారు. అయితే జగ్గంపేట మండలం ఇరుపాకలో కోటి శివలింగార్చనకు ముద్రగడను ఆహ్వానించడానికి మాత్రమే వెళ్లానని నెహ్రూ తెలిపారు. రాబోయే ఎన్నికల్లో తాను పోటీ చేస్తున్నానని సహకారం ఇవ్వాలని కోరితే మద్దతు తెలుపుతానని ముద్రగడ హామీ ఇచ్చారని నెహ్రూ వెల్లడించారు.
వైఎస్సార్సీపీకి ఓటమి కళ్లెదుట కనిపిస్తోంది - అందుకే కొందరు కాపు పెద్దలను రెచ్చగొడుతోంది: పవన్
కొందరు కాపులను వైఎస్సార్సీపీ కావాలనే రెచ్చగొడుతోందని, వారి ఉచ్చులో పడొద్దని జనసేన అధినేత పవన్ కల్యాణ్‌ ఇటీవల బహిరంగ లేఖ రాశారు. కాపు పెద్దలు తిట్టినా దీవెనలుగానే తీసుకుంటానని, నాయకులు ఎవరు వచ్చినా తలుపులు తెరిచే ఉంటాయని లేఖలో పేర్కొన్నారు. దీనిపై ముద్రగడ పద్మనాభం తన అనుచరుల వద్ద సానుకూలంగా స్పందించినట్లు సమాచారం. ముద్రగడ పద్మనాభంకు అప్తులైన జనసేన, కాపు నాయకులు ఆయన నివాసానికి వెళ్లి జనసేనలో చేరమని ఆహ్వానించారు.
దీనిపై సానుకూలంగా స్పందించిన ముద్రగడ పద్మనాభం జనసేనానికి ఇవ్వమని బొలిశెట్టి శ్రీనివాస్‌కు ఓ లేఖ ఇచ్చినట్లు సమాచారం. ఈ లేఖను పవన్ కల్యాణ్‌కు అందజేసిన తర్వాత భవిష్యత్తు పరిణామాలపై స్పష్టత వచ్చే అవకాశం ఉంది. వారం రోజుల్లో పవన్‌కల్యాణ్‌, ముద్రగడ భేటీ అయ్యే అవకాశం ఉందని జనసేన నేతలు చెబుతున్నారు.
జనసేన, తెలుగుదేశం, కాపు నేతలు ముద్రగడతో వరుసగా భేటీ కావడంతో వైఎస్సార్సీపీ అప్రమత్తమైంది. ఓ ఎమ్మెల్సీ ఫోన్‌ చేసి ఇంటికి వస్తానని చెప్పగా 'రావద్దు మీ పని మీరు చూసుకోండి, మీ పార్టీలో చేరే ఉద్దేశం లేదు' అని ముద్రగడ చెప్పారనే ప్రచారం చక్కర్లు కొడుతోంది. అయితే తాజా పరిణామాలపై ముద్రగడ గానీ, ఆయన కుమారుడు గానీ స్పందించలేదు.
మేనిఫెస్టోపై జనసేన కసరత్తు - నాదెండ్ల మనోహర్ సారథ్యంలో సమావేశం
