Jaya Bachchan in Rajya Sabha: మాదక ద్రవ్యాల రవాణా, ఆర్థిక సాయం చేసే నేరస్ధులను శిక్షించేందుకు ఉద్దేశించిన నార్కోటిక్స్‌, సైకో-ట్రోపిక్‌ సబ్‌స్టాన్సెస్‌ సవరణ బిల్లు-2021కు రాజ్యసభ ఆమోదం తెలిపింది. ఆర్థిక మంత్రి నిర్మలా సీతారామన్‌ బిల్లును ప్రవేశపెట్టగా, రాజ్యసభ మూజువాణి ఓటుతో ఆమోదం తెలిపింది. అయితే ఈ బిల్లుపై చర్చ సందర్భంగా రాజ్యసభలో తీవ్ర గందరగోళం ఏర్పడింది.
తనపై వ్యక్తిగత విమర్శలు చేశారని సమాజ్వాదీ పార్టీ నేత, ఎంపీ జయా బచ్చన్.. రాజ్యసభలో అధికార భాజపాపై మండిపడ్డారు. భాజపా త్వరలోనే గడ్డు రోజులను ఎదుర్కొంటుందని తాను శపిస్తున్నాని చెప్పారు. నిజాయితీగా వ్యవహరించాలని రాజ్యసభ ఛైర్మన్కు ఆమె సూచించారు. ప్రతిపక్షాల గొంతును అణచివేసే కుట్ర జరుగుతోందని ఆరోపించారు.
అసలేమైందంటే..?
Jaya bachhan personal comments: బిల్లుపై చర్చ సమయంలో జయ మాట్లాడుతూ.. 12 మంది నేతలపై సస్పెన్షన్ను రద్దు చేయాలని డిమాండ్ చేశారు. ఈ క్రమంలో అధికార భాజపా సభ్యుడు ఒకరు ఆమెపై వ్యక్తిగతంగా విమర్శలు చేశారు. దీంతో ఆమె తీవ్ర ఆగ్రహం వ్యక్తం చేశారు. రాజ్యసభ ఛైర్మన్ స్థానంలో ఉన్న భువనేశ్వర్ కలితా.. ఒకప్పుడు వెల్లోకి దూసుకొచ్చి నిరసన చేసే వారని వ్యాఖ్యానించారు. దీనిపై భాజపా సభ్యులు మండిపడ్డారు.
ఛైర్మన్ స్థానాన్ని అగౌరపరిచేందుకు జయా బచ్చన్ యత్నిస్తున్నారని భాజపా నేత రాకేశ్ సిన్హా ధ్వజెత్తారు. అయినప్పటికీ జయా బచ్చన్ తన ప్రసంగాన్ని కొనసాగించారు. "దేశం ఎన్నో ప్రధానమైన సమస్యలను ఎదుర్కొంటూ ఉంటే.. కాగితంపై ఓ తప్పును సరిదిద్దడానికి 3-4 గంటలపాటు సభ నడపుతున్నారు" అని ఆమె అన్నారు.
"నాపై, నా వ్యక్తిగత జీవితంపై కామెంట్ చేసిన సదరు సభ్యుడిపై చర్యలు తీసుకుంటారని భావిస్తున్నాను. మీరు(ఛైర్మన్) నిష్పక్షపాతంగా ఉండాలి. ఏ పార్టీకి చెందనివారిలా వ్యవహరించాలి. వారు నాపై వ్యక్తిగత విమర్శలు ఎలా చేస్తారు? మీకు చెడ్డరోజులు వస్తాయి. నేను శపిస్తున్నాను"
-జయా బచ్చన్, ఎస్పీ ఎంపీ
తన కోడలు, నటి ఐశ్వర్యారాయ్ బచ్చన్.. పనామా పత్రాల కేసులో సోమవారం ఈడీ ముందు హాజరైన తర్వాత రాజ్యసభలో జయా బచ్చన్ ఈ వ్యాఖ్యలు చేయడం గమనార్హం.
ఇదీ చూడండి: 'నా బుగ్గల్ని భద్రంగా చూసుకోవాలేమో'.. ఎమ్మెల్యే వ్యాఖ్యలపై హేమ
