Indian stand on Ukraine war: రష్యా-ఉక్రెయిన్ సంక్షోభానికి భారత్ వ్యతిరేకమని నొక్కిచెప్పారు విదేశాంగ మంత్రి ఎస్ జైశంకర్. భారత్ ఒక పక్షంవైపు నిలబడాల్సి వస్తే .. అది శాంతి, హింసకు వెంటనే ముగింపు పలికే పక్షమేనని స్పష్టం చేశారు. ఉక్రెయిన్లోని పరిస్థితులుపై లోక్సభలో చర్చ సందర్భంగా ఈ వ్యాఖ్యలు చేశారు జైశంకర్. దేశ నమ్మకాలు, విలువలు, జాతీయ ప్రయోజనం, వ్యూహం ప్రకారమే భారత వైఖరి ఉంటుందనే విషయాన్ని సభ్యులందరూ అంగీకరించాలని సూచించారు.
"మనం యుద్ధానికి వ్యతిరేకం. అమాయకుల ప్రాణాలు తీయటం, రక్తపాతంతో పరిష్కారం లభించదని మనం గట్టిగా నమ్ముతున్నాం. ప్రస్తుత రోజుల్లో ఏ సమస్యకైనా దౌత్యపరంగా చర్చించటమే సరైన సమాధానం. సమకాలీన ప్రపంచంలో అన్ని దేశాల సార్వభౌమాధికారం, ప్రాదేశిక సమగ్రతకు కట్టుబడి ఉండేందుకు ఐక్యరాజ్య సమితిలో నిబంధనలు నిర్మితమైనట్లు ప్రతిఒక్కరూ గుర్తుంచుకోవాలి. భారత్ ఒక పక్షాన్ని ఎంచుకోవాల్సి వస్తే.. అది శాంతి పక్షమే. అలాగే హింసకు వెంటనే ముగింపు పలికేందుకే. ఇదే మా సూత్రప్రాయ వైఖరి. ఐరాసతో పాటు అంతర్జాతీయ వేదికలు, చర్చల్లో మా వైఖరిని తెలియజేస్తూ వస్తున్నాం."
- ఎస్ జైశంకర్, విదేశాంగ శాఖ మంత్రి.
ఉక్రెయిన్లోని బుచాలో అమాయకపు పౌరులను చపటం తీవ్ర దిగ్భ్రాంతికి గురి చేసిందన్నారు జైశంకర్. బుచాలో హత్యలను తీవ్రంగా ఖండిస్తున్నట్లు చెప్పారు. ఇది తీవ్రమైన అంశమని.. స్వతంత్ర దర్యాప్తు చేపట్టాలన్న వాదనకు మద్దతు పలుకుతున్నామని తెలిపారు. ఉక్రెయిన్ పరిస్థితికి సంబంధించి భారత చర్యలకు రాజకీయ రంగును ఆపాదించటం దురదృష్టకరమన్నారు మంత్రి.
ఇదీ చూడండి: ఉక్రెయిన్లో హత్యలను ఖండించిన భారత్
