భారత పర్యటనలో ఉన్న అమెరికా రక్షణమంత్రి లాయిడ్ ఆస్టిన్.. దేశంలోని మైనారిటీల మానవహక్కుల సమస్యలపై మంత్రులతో చర్చించినట్టు తెలిపారు. ఇలాంటి చర్చలు భాగస్వామ్య దేశాల మధ్య ఉండాలని ఉద్ఘాటించారు.
అయితే.. ప్రధానమంత్రి నరేంద్ర మోదీతో శుక్రవారం జరిగిన భేటీలో.. ఈ అంశం ప్రస్తావనకు రాలేదని స్పష్టం చేశారు ఆస్టిన్.
"ఈ విషయం(భారత్లో మైనారిటీల మానవహక్కులు)పై మోదీతో మాట్లాడే అవకాశం నాకు లభించలేదు. కానీ.. ఇతర కేంద్రమంత్రులతో ఈ సమస్యపై చర్చించాను. భారత్.. అమెరికా భాగస్వామ్య దేశం. ఈ భాగస్వామ్యానికి అగ్రరాజ్యం విలువనిస్తుంది. భాగస్వామ్య దేశాలుగా.. ఇలాంటి చర్చలు జరగడం ఉత్తమం. అర్థవంతమైన చర్చలతో సమస్యలపై పురోగతి సాధించవచ్చు. మానవహక్కులు, చట్టాలు అమెరికాకు ఎంతో ముఖ్యమని అధ్యక్షుడు జో బైడెన్ ఎన్నో సార్లు అన్నారు. మా విలువలను దృష్టిలో పెట్టుకునే మేము ముందుకు సాగుతాం. భారత్ కూడా.. ఎన్నో విలువలున్న ప్రజాస్వామ్య దేశం. ఇరు దేశాలు కలిసి పని చేసేందుకు ఎన్నో అంశాలు ఉన్నాయి."
--- లాయిడ్ ఆస్టిన్, అమెరికా రక్షణమంత్రి.
పర్యటనలో భాగంగా.. భారత విదేశాంగమంత్రి జై శంకర్, రక్షణమంత్రి రాజ్నాథ్ సింగ్లతో భేటీ అయ్యారు ఆస్టిన్. వివిధ అంశాలపై వీరు చర్చించారు.
ఈ సందర్భంగా.. భారత్-చైనా సరిహద్దు ఉద్రిక్తతలు, ఇండో-పసిఫిక్ అంశంపైనా స్పందించారు ఆస్టిన్.
"భారత్-చైనాలు యుద్ధం అంచున ఉన్నట్టు మేము ఎప్పుడూ భావించలేదు. నేను కూడా ఎప్పుడూ ఆ ఉద్దేశంతో లేను. మరోవైపు ఇండో-పసిఫిక్లో శాంతి స్థాపనకు భారత్-అమెరికా సరైన చర్యలే చేపడుతున్నాయి. భవిష్యత్తులో కూడా మా వ్యూహం ఇలాగే కొనసాగుతుంది."
--- లాయిడ్ ఆస్టిన్, అమెరికా రక్షణమంత్రి.
ఇదీ చదవండి: భారత్కు చేరుకున్న అమెరికా రక్షణ మంత్రి
