బంగాల్ మంత్రి, తృణమూల్ కాంగ్రెస్ సీనియర్ నేత సోవన్దేవ్ చటోపాధ్యాయ ఎమ్మెల్యే పదవికి రాజీనామా చేశారు. తన రాజీనామాను స్పీకర్ బీమన్ బెనర్జీకి సమర్పించారు.
ఆయన స్వచ్ఛందంగానే ఈ నిర్ణయం తీసుకున్నారా అనేది విచారించి సంతృప్తి చెందిన తర్వాతే రాజీనామా ఆమోదించినట్లు తెలిపారు సభాపతి.
కోల్కతాలోని భవానీపుర్ నియోజకవర్గం నుంచి సోవన్దేవ్ మూడు వారాల క్రితమే ఎన్నికల్లో గెలిచారు.
మమత కోసమేనా?
నిజానికి భవానీపుర్ మమతా బెనర్జీ సొంత నియోజకవర్గం. ఎన్నికల ముందు జరిగిన పరిణామాల నేపథ్యంలో ఆమె ఆ స్థానాన్ని వీడి.. నందిగ్రామ్ నుంచి పోటీ చేశారు. భాజపా అభ్యర్థి సువేందు అధికారి చేతిలో ఓడిపోయారు. అయినా ముఖ్యమంత్రి పదవి చేపట్టిన మమత.. 6 నెలల్లోగా శాసనసభకు ఎన్నిక కావాల్సి ఉంది. ఆమె పోటీ చేసేందుకు వీలుగా భవానీపుర్ నియోజకవర్గ ఎమ్మెల్యే పదవికి చటోపాధ్యాయ రాజీనామా చేసినట్లు తెలుస్తోంది.
