Covid Cases India: భారత్లో రోజువారీ కొవిడ్ కేసుల సంఖ్య స్వల్పంగా పెరిగింది. గురువారం ఉదయం నుంచి శుక్రవారం ఉదయం వరకు కొత్తగా 1335 మందికి వైరస్ సోకింది. మరో 52 మంది వైరస్తో మరణించారు. 1918 మంది ఆస్పత్రుల నుంచి డిశ్చార్జి అయ్యారు. మరోవైపు దేశంలో వ్యాక్సినేషన్ ప్రక్రియ జోరుగా సాగుతోంది. గురువారం మరో 23,57,917 డోసులు పంపిణీ చేశారు. దీంతో మొత్తం పంపిణీ చేసిన టీకా డోసుల సంఖ్య 1,84,31,89,377కు పెరిగింది. దేశంలో యాక్టివ్ కేసులు 0.03శాతానికి చేరాయి. ఇప్పటివరకు 98.76 శాతం మంది కోలుకున్నారు. దేశవ్యాప్తంగా నిన్న ఒక్కరోజే 6,06,036 కరోనా టెస్టులు నిర్వహించింది కేంద్ర ప్రభుత్వం.
- మొత్తం కేసులు: 4,30,25,775
- మొత్తం మరణాలు: 5,21,181
- యాక్టివ్ కేసులు: 13,672
- కోలుకున్నవారు: 4,24,90,922
ప్రపంచవ్యాప్తంగా పరిస్థితి ఎలా ఉందంటే: ప్రపంచవ్యాప్తంగా కరోనా ఉద్ధృతి కొనసాగుతోంది. శుక్రవారం అన్ని దేశాల్లో కలిపి మరో 14 లక్షల 41 వేలకుపైగా కొత్త కేసులు వెలుగుచూశాయి. దాదాపు మరో 4 వేల మరణాలు నమోదయ్యాయి. మొత్తం కేసుల సంఖ్య 48,81,91,383కు చేరగా.. మృతుల సంఖ్య 61,66,429కి పెరిగింది. కరోనా ప్రభావం జర్మనీ, దక్షిణ కొరియాలో అత్యధికంగా ఉంది. ద.కొరియాలో ఒక్కరోజే 3 లక్షల 20 వేలు, జర్మనీలో 2 లక్షల 57 వేల కరోనా కేసులు నమోదయ్యాయి.
ఇవీ చూడండి: వీడ్కోలు వేదికపై పాటలతో అలరించిన రాజ్యసభ ఎంపీలు
