పతంజలి సంస్థ విడుదల చేసిన కొరొనిల్ టాబ్లెట్పై ఇండియన్ మెడికల్ అసోసియేషన్(ఐఎంఏ) విస్మయం వ్యక్తం చేసింది. కరోనా ఎదుర్కొనేందుకు అభివృద్ధి చేసిన తమ ఔషధాన్ని ప్రపంచ ఆరోగ్య సంస్థ(డబ్ల్యూహెచ్ఓ) ధ్రువీకరించిందని చెప్పడాన్ని తప్పుబట్టింది. దీనిపై వివరణ ఇవ్వాలని.. ఈ ఔషధ ఆవిష్కార కార్యక్రమానికి హాజరైన కేంద్ర వైద్య ఆరోగ్య శాఖ మంత్రి హర్షవర్ధన్ను డిమాండ్ చేసింది.
"వైద్య ఆరోగ్య శాఖ మంత్రి హోదాలో ఉండి ఒక తప్పుడు, అశాస్త్రీయమైన వస్తువును ఎలా దేశ ప్రజల కోసం విడుదల చేస్తారు? కరోనాను ఎదుర్కొనే ఔషధం అని చెప్పేందుకు దీనిపై జరిగిన క్లినికల్ ట్రయల్స్ గురించి వివరిస్తారా? మంత్రి నుంచి దేశ ప్రజలకు వివరణ కావాలి. దీనిని సుమోటోగా తీసుకోవాలని జాతీయ వైద్య మండలికి మేము లేఖ రాశాం. కొరొనిల్ను డబ్ల్యూహెచ్ఓ ధ్రువీకరించిందన్న విషయాన్ని తెలుసుకుని మేం ఆశ్చర్యానికి గురయ్యాం."
-- ఇండియన్ మెడికల్ అసోసియేషన్.
ఫిబ్రవరి 19న ఈ కొరొనిల్ టాబ్లెట్ను యోగా గురు బాబా రామ్ దేవ్ ఆవిష్కరించారు. తమ సంస్థ విడుదల చేస్తున్న ఈ ఔషధానికి డబ్ల్యూహెచ్ఏ ధ్రువీకరణ స్కీమ్లో భాగంగా.. కేంద్ర ఔషధ నియంత్రణ సంస్థకు చెందిన ఆయుష్ విభాగం ఆమోదించిందని చెప్పారు.
కొవిడ్కు సంబంధించి ఎలాంటి సంప్రదాయ ఔషధాలను తాము అనుమతి ఇవ్వలేదని ట్విట్టర్ వేదికగా డబ్ల్యూహెచ్ఓ స్పష్టం చేసిన అనంతరం కొరొనిల్ వ్యవహారంపై ఐఎంఏ దృష్టి సారించింది.
కొరొనిల్ ఔషధం విషయంలో నెలకొన్న ఈ అనిశ్చితిపై పతంజలి మేనేజింగ్ డైరెక్టర్ బాలకృష్ణ ట్విట్టర్ వేదికగా వివరణ ఇచ్చారు. డబ్ల్యూహెచ్ఓ ఎలాంటి ఔషధాలకు అనుమతి ఇవ్వదని తెలిపారు. ప్రజలకు ఆరోగ్యకరమైన భవిష్యత్తును అందించేందుకు డబ్ల్యూహెచ్ఓ కృషి చేస్తుందని చెప్పారు.
ఇదీ చదవండి:బొగ్గు చౌర్యం కేసులో గంభీర్కు సీబీఐ ఉచ్చు!
