IAS Officer Abhishek Singh : సినిమాల కోసం IAS ఉద్యోగానికి రాజీనామా.. ఆ అధికారి కథేంటో తెలుసా?

IAS Officer Abhishek Singh : సినిమాలపై మక్కువతో ఐఏఎస్ ఉద్యోగానికి రాజీనామా చేశారు ఓ అధికారి. ఈ విషయాన్ని అడ్మినిస్ట్రేషన్ ఉన్నతాధికారులు వెల్లడించారు.

IAS Officer Abhishek Singh : సస్పెన్షన్​కు గురైన ఓ ఐఏఎస్ అధికారి సర్వీస్ ఉండగానే తన ఉద్యోగాన్ని వదులుకున్నారు. నటన, మోడలింగ్​లో ఆసక్తితో ఈ నిర్ణయం తీసుకున్నారు. ఈ విషయాన్ని డిపార్ట్​మెంట్ ఉన్నత అధికారులు వెల్లడించారు. దీంతో ప్రస్తుతం ఆ అధికారి నిర్ణయం చర్చనీయాంశంగా మారింది. ఇంతకీ ఆ అధికారి ఎవరంటే..?

ఉత్తర్​ప్రదేశ్​కు చెందిన అభిషేక్​ సింగ్.. యూపీ కేడర్ 2011 బ్యాచ్​కు చెందిన ఐఏఎస్ అధికారి. అభిషేక్​ సింగ్​కు ఎప్పటి నుంచో సినిమాలపై మక్కువ. ఇప్పటికే కొన్ని సినిమాలకు పని చేశారు కూడా. ఇకపై ఆ రంగంలో రాణించేందుకే ఆయన రాజీనామా చేశారని సంబంధిత వర్గాలు వెల్లడించాయి.

• View this post on Instagram

  A post shared by Abhishek Singh (@abhishek_as_it_is)

ఆయన సర్వీసులో అనేక వివాదాలు ఎదుర్కొన్నారు అభిషేక్. అభిషేక్​ది యూపీ కేడర్ కాగా.. డిప్యుటేషన్​పై 2015లో దిల్లీకి వెళ్లారు. ఆ వ్యవధిని 2018లో మరో రెండేళ్లకు పెంచారు అధికారులు. అయితే సినిమాలు, మోడలింగ్​పై ఆసక్తి ఉన్న అభిషేక్.. ఆ సమయంలో మెడికల్ లీవ్​ తీసుకొని విధులకు దూరంగా ఉన్నారు. ఈ కారణంగా దిల్లీ ప్రభుత్వం అతడిని.. 2020 మార్చి​లో సొంత రాష్ట్రానికి పంపింది. అయినా అభిషేక్ వెంటనే విధుల్లో చేరలేదు. అందుకు సరైన కారణం చెప్పకుండా అభిషేక్.. మూడు నెలల తర్వాత జూన్​లో విధుల్లో చేరారు.

గుజరాత్​ ఎన్నికల డ్యూటీలో సస్పెండ్..
గతేడాది అభిషేక్​ గుజరాత్ అసెంబ్లీ ఎన్నికల అబ్జర్వర్​గా ఎంపికయ్యారు. ఆ బాధ్యతల నిమిత్తం గుజరాత్ వెళ్లిన అభిషేక్.. తానే అబ్జర్వర్​ అని తెలిపే ఫొటో ఒకటి ఇన్​స్టాగ్రామ్​లో పోస్ట్​ చేశారు. దీంతో ఆయనపై వేటు పడింది. ఆయన్ను ఎన్నికల విధుల నుంచి తప్పించింది ఈసీ. ఆ తర్వాత కూడా ఆయన కొన్ని రోజులు ఐఏఎస్ బాధ్యతలు స్వీకరించలేదు. ఇక విధుల్లో నిర్లక్ష్యం వహించారన్న కారణంగా ఈ ఏడాది ఫిబ్రవరిలో అభిషేక్ సస్పెండ్ అయ్యారు. ఇప్పటికీ ఆయనపై సస్పెన్షన్ వేటు ఉన్నట్లు అధికారులు తెలిపారు.

భార్య కూడా ఐఏఎస్​..
అభిషేక్ సతీమణి శక్తి నాగ్​పాల్ కూడా ఐఏఎస్ అధికారియే. ఆమె యూపీలో అప్పట్లో అఖిలేశ్ యాదవ్ సర్కారు పట్ల కఠిన వైఖరి అవలంబించిన ఐఏఎస్​గా పేరుగాంచారు.

సోషల్ మీడియాలో ఫాలోయింగ్ అదుర్స్..
అభిషేక్ సింగ్​కు ఇన్​స్టాగ్రామ్​లో 5 మిలియన్ల మంది ఫాలోవర్లు ఉన్నారు. ఆయన నటించిన కొన్ని మ్యూజిక్ ఆల్బమ్స్​లోని క్లిప్పింగ్స్​ను అందులో పోస్ట్​ చేశారు అభిషేక్. రీసెంట్​గా వినాయక చవితి ఉత్సవాల సమయంలో బాలీవుడ్​ స్టార్ హీరోలు షారుక్ ఖాన్, సల్మాన్​ ఖాన్​ను కలిసిన ఫొటోలు కూడా సోషల్ మీడియాలో షేర్ చేశారు.